Թուրքական Cihan լրատվական գործակալության փոխանցմամբ՝ Թուրքիայի վարչապետ Ռեջեփ Թայիփ Էրդողանը հեռախոսազրույց է ունեցել Իրանի նախագահ Մահմուդ Ահմադինեժադի հետ, որի ընթացքում քննարկել են սիրիական վերջին զարգացումները։
Հեռախոսազրույցի ժամանակ Ահմադինեժադն Էրդողանին հայտարարել է, որ անթույլատրելի է տարածաշրջանային հակամարտություններին Արևմուտքի միջամտությունը։ Նա Էրդողանին առաջարկել է Սիրիայի հարցը լուծել առանց ԱՄՆ միջամտության.
«Ժողովրդավարությունը, ազատությունը և արդարությունը դա ժողովրդի իրավունքն է։ Սակայն գերտերությունների կողմից այդ գործոնն օգտագործվում է միջամտության համար, ինչն էլ ավելի է խորացնում տարածաշրջանային զարգացումները։ Դրա վառ օրինակը Լիբիան է»։
Ահմադինեժադը հավելել է, որ Իրանը պատրաստ է տարածաշրջանում արդարություն ու ժողովրդավարություն հաստատելու հարցում համագործակցել Թուրքիայի հետ։
Հիշեցնենք, որ երեկ էլ թուրքական Zaman թերթը գրել էր, թե Ստամբուլի Դոլմաբահչե պալատ ուղևորվելիս Էրդողանի ավտոշարասյունն անսպասելիորեն կանգ է առել ճանապարհին՝ Բողազիչի կամրջի մոտ, ինչի պատճառը եղել է Էրդողանի և Ահմադինեժադի՝ 37 րոպե տևած հեռախոսազրույցը: Դրա պատճառով կամրջի վրա խցանումներ են առաջացել։
