Համակարգի կուսակցականացման խնդրի վերաբերյալ քաղաքացիական ծառայության խորհրդի նախագահ Մանվել Բադալյանը ամիսներ առաջ դիմել էր վարչապետ Տիգրան Սարգսյանին: Այսօր Մանվել Բադալյանը նշեց, որ դա իր պտուղները ինչ-որ առումով տվել է, սակայն չկարողացավ կոնկրետացնել, թե խոսքն ինչ տեսակի պտուղների մասին է: Փոխարենը ավելացրեց, որ եղել և մնում է նույն կարծիքին, որ այս մեր քաղաքական չկայացած համակարգի պայմաններում այսքան կուսակցականացումը չի բխում ոչ միայն քաղաքացիական ծառայության շահերից, այլ նաև պետական կառավարման համակարգի շահերից և նրա արդյունավետ գործունեության կազմակերպման հրամայականից: Նա հիշեցրեց, որ ոչ թե ասել է՝ կրճատեք կուսակցականներին, այլ՝ մի՛ կուսակցականացրեք համակարգը: «Որովհետև եթե կուսակցականացրել եք ձեր աշխատակազմին, որ ձեզանից առաջ նախորդ նախարարի կուսակցական ընկերներն են եղել, կներեք, թշվառ մարդիկ են: Երկու կողմին էլ ես թշվառ եմ համարում, որովհետև նրանց չի կարելի հասցնել այդ վիճակին, բայց եթե հասցնում էլ են, չեմ հարգում նրան, որ ամեն գրպանում մի հատ կուսակցական տոմս ունի»,- նշեց Մանվել Բադալյանը և ավելացրեց, որ կան երկրներ, որտեղ քաղաքացիական ծառայողների՝ կուսակցության անդամ լինելն արգելված է օրենքով, և ինքը շատ ուրախ կլինի, եթե մեզանում էլ այդ դրույթը գործի:
