Ռուս-վրացական սահմանին Վերին Լարսի անցակետը կրկին փակ է բոլոր տեսակի ավտոմեքենաների համար: Իսկ բեռնատարների համար ճանապարհը փակվել է դեռևս մեկ շաբաթ առաջ՝ մարտի 17-ից: Այս ընթացքում Վերին Լարսում ռուսական կողմից հազարավոր բեռնատարներ են կուտակված:
Այս առնչությամվ Ռուսաստանում Հայաստանի դեսպանության մաքսային կցորդ Արամ Թանանյանը «Առաջին լրատվական»-ի հետ զրույցում նշեց, որ երեկ ինչ-որ պահի մարդատար մեքենաների համար ճանապարհը բացվել է, բայց գիշերը նորից ձնահյուս է իջել, որից հետո դարձյալ փակվեց բոլոր մեքենաների համար:
«Այսինքն բեռնատարներն արդեն մեկ շաբաթ կանգնած են: Բեռնատարների թիվը արդեն 3,5 հազարն անցել է: Դա բավական բարդ է հաշվարկել, բայց հաստատ 3500-ից ավելի է: Դրանց մեջ ընդամենը 15-20 տոկոսը հայկական մեքենաներ են, կամ Հայաստան բեռ բերող մեքենաներ: Հուսով եմ՝ այսօր կբացվի Լարսը, որովհետև երեկվանից լավ եղանակ է, պարզապես խնդիրն այն է, որ ձնահյուսերը արևոտ եղանակին իջնում են»,-ասաց նա:
Անդրադառնալով հնարավոր այլընտրանքային ճանապարհներին՝ Թանանյանը նշեց. «Այլընտրանքային ճանապարհներ եղել են Հարավային Օսիայով և Աբխազիայով, բայց 2008-ի հայտնի դեպքերից հետո այդ երկու ճանապարհները չեն գործում քաղաքական դրդապատճառներով: Վրաստանը եվրոպական ֆինանսական ռեսուրսներով պատրաստ է թունել կառուցել, արդեն սկսել է կառուցումը, որի երկարությունը 24 կմ է լինելու, որից 10 կմ-ն մաքուր թունելային հատվածն է: Նպատակն այն է, որ ձմռան ամիսներին եղանակի պատճառով այլևս չկանգնեն մեքենաները: Բայց այդ թունելը շահագործման կհանձնվի 2024 թվականին: Իսկ մինչ այդ մենք կախված ենք լինելու Լարսի ճանապարհից: Սա մեր միակ ճանապարհն է: Եթե այլ երկրները կարող են այլ ճանապարհով գնալ, մասնավորապես, կարող են Ռուսաստանից Դաղստանով մտնել Ադրբեջան, հետո մտնել Վրաստան ու գնալ Եվրոպա ու Թուրքիա: Իսկ մեր դեպքում Ռուսաստանի հետ կապող միակ ճանապարհը Լարսն է, սա մեր միակ պորտալարն է»:
Նա նկատեց, որ այս եղանակային պայմաններում Լարսի անցակետով անցնող վարորդները խիզախներ են. «Վարորդների համար որևէ հարմարություն չկա, և մեր վարորդները պարզապես խիզախորեն գործում են: Վարորդներն աշխատում են եղանակային վատ պայմանների դեպքում արագ փչացող սննդամթերք չտեղափոխել: Դրանք տեղափոխում են սառնարաններով: Որպես կանոն այդպիսի բեռները որևէ արտոնություն չունեն մյուսների համեմատ: նույնիսկ պայթյունավտանգ նյութերը ցիստեռներով տեղափոխում են ընդհանուր հերթի պայմաններով, ինչն ընդհանրապես անտրամաբանական է: Մարդիկ իրենք են հետևում հերթին, արտահերթ որևէ մեկի շարժը մեծ լարումների, անգամ բախումների է բերում»:
Նա հույս հայտնեց, որ եղանակը այսօրվանից կտաքանա, արդյունքում մեքենաների համար Լարսը կլինի անցանելի, սակայն հավելեց, որ դեռ մեկուկես ամիս պահանջվի, որ այս խցանումներն ավարտվեն։
