Ամերիկացի պաշտոնյաները թուրք գործընկերների հետ խորհրդակցությունների ժամանակ անդրադարձել են Անկարայի կողմից Կիևին S-400 զենիթահրթիռային համակարգեր փոխանցելու հնարավորությանը, սակայն պաշտոնապես նման առաջարկ չեն արել։ Այս մասին հայտնել է Reuters-ը։
Այս թեման, մասնավորապես, «համառոտ քննարկվել» էր ավելի վաղ՝ մարտին ԱՄՆ պետքարտուղարի առաջին տեղակալ Վենդի Շերմանի Թուրքիա կատարած այցի ժամանակ։
Ինչպես նշվում է հրապարակման մեջ, ըստ վերլուծաբանների, «այդ գաղափարը, անշուշտ, կմերժվի Թուրքիայի կողմից»։ Գործակալության աղբյուրները նշել են, որ այս տարբերակը թուրքական կողմի համար անընդունելի է մի շարք պատճառներով, այդ թվում՝ Մոսկվայի հետ հարաբերությունները փչացնելու Անկարայի ցանկության բացակայության պատճառով։
ԱՄՆ պաշտոնյաները վերջին շաբաթներին ակտիվացրել են ջանքերը՝ «բարելավելու լարված հարաբերությունները» Անկարայի հետ և «Թուրքիան վերադարձնելու Վաշինգտոնի ուղեծիր», – նշել է գործակալությունը: Սակայն այս ոլորտում որևէ կոնկրետ առաջարկ դեռ մշակված չէ, ասվում է նյութում։
Գործակալությունը նշում է, որ ԱՄՆ իշխանությունները դաշնակիցներին խնդրել են դիտարկել իրենց խորհրդային կամ ռուսական արտադրության զենքերը Ուկրաինային փոխանցելու հնարավորությունը։
Հիշեցնենք, որ Ռուսաստանը և Թուրքիան պայմանագիր են ստորագրել Մոսկվայի կողմից Անկարային S-400 ՀՕՊ համակարգերի մատակարարման վերաբերյալ։ 2017թ. Թուրքիան ՆԱՏՕ-ի առաջին երկիրն էր, որը ձեռք բերեց այդ համակարգերը Ռուսաստանից։ Անկարայի որոշումը առաջացրել է ԱՄՆ-ի և ամբողջ դաշինքի կտրուկ բացասական արձագանքը։ ԱՄՆ-ը չի դադարում փորձել ստիպել Թուրքիային հրաժարվել ռուսական հակաօդային պաշտպանության համակարգերից։
