Ուկրաինայի նախագահ Վլադիմիր Զելենսկին օրենք է ստորագրել երկրում ռազմական դրության երկարաձգման մասին, հայտնում է Գերագույն Ռադայի մամուլի ծառայությունը։
«2022 թվականի մարտի 20-ի դրությամբ Ուկրաինայի նախագահը ստորագրել է Ուկրաինայի օրենքները՝ «Ուկրաինայում ռազմական դրության երկարաձգման մասին» թիվ 2119-IX հրամանագիրը հաստատելու մասին օրենքը (գրանցման թիվ 7168)»,-ասված է հաղորդագրության մեջ։
Նշենք, որ մարտի 15-ին Գերագույն Ռադան օրենսդրորեն հաստատել է նախագահի հրամանագիրը, որով Ուկրաինայում ռազմական դրությունը մարտի 26-ի ժամը 05:30-ից երկարաձգվում է ևս 30 օրով՝ մինչև ապրիլի 25-ը։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
