Ուկրաինա Ռուսաստանի ներխուժման պատճառով Արևմտյան երկրների կողմից Ռուսաստանի դեմ խստագույն պատժամիջոցների ֆոնին շարունակում է մեծ հոսքով ռուս, նաև ուկրաինացի, բելառուս այցելուների ժամանումը Հայաստան։ Դրան զուգահեռ ՝ Երևանում աճում են վարձակալվող բնակարանների, հյուրանոցների գները։ «Առաջին լրատվական»-ը փորձեց պարզել՝ ի՞նչ պատկեր է տիրում անշարժ գույքի շուկայում և ռուսաստանցիները ի՞նչ ժամկետով են հիմնականում նախընտրում վարձակալել Հայաստանում բնակարանները և ընդհանուր ի՞նչ միտումներ կան։
«Երկիր» անշարժ գույքի գործակալության Կենտրոնի մասնաճյուղից մեզ ասացին,որ երկու շաբաթ շարունակ բնակարան վարձակալելու նպատակով ռուսների դիմելիության բավականին բարձր տեմպը դեռ պահպանվել է, չի նվազում. «Ռուսաստանի քաղաքացիները ցանկանում են ժամանակավոր բնակություն հաստատել Երևանի բոլոր վարչական շրջաններում, հատկապես Կենտրոն և Արաբկիր շրջաններում, իսկ ծայրամասերում ավելի քիչ է դիմելիությունը։ Դրան զուգահեռ, ինչպես հայտնի է, սեփականատերերը բարձրացնում են իրենց բնակարանների վարձակալության գները. Այս պահին գների միջինը կազմում է մոտ 2000-3000 դոլար»,-նկատում է մեր զրուցակիցը։
Հարցին, թե ի՞նչ ժամկետով են գալիս ռուսները և գերակշռո՞ւմ են անհատները, ընտանիքները թե՞ կազմակերպությունները, աշխատակիցը նշեց, որ հիմնականում իրենց վարձակալում են հիմնականում ընտանիքներով և ոչ այնքան կարճ ժամանակով։ «Ավելի մեծ թիվ են կազմում վեց ամիս ժամանակով վարձակալողները, իսկ կարճաժամկետի դեպքում՝մոտ երկու ամիս ժամանակով են նախընտրում մնալ»,-ասում է նա։ Աշխատակցի խոսքով՝ իրենց դիմած ռուսների մեջ համեմատաբար ավելի քիչ են անհատների ու կազմակերպությունների դիմումները, հատուկենտ են։
Հարցին, թե եղե՞լ են դեպքեր արդյոք,երբ սեփականատերերը իրենց հայ վարձակալներին դուրս հանեն իրենց բնակարաններից, որպեսզի տրամադրեն ռուս վարձակալների ավելի բարձր գնով, գործակալության Կենտրոնի գրսենյակից ասացին, որ նման դեպքեր չեն գրանցվել իրենց պրակտիկայում։
«ՎԻՎԱ ՌԻԵԼԹԻ» անշարժ գույքի գործակալությունից մեզ փոխանցեցին, որ իրենք աշխատում են հիմնականում սեփականատերերի հետ, ովքեր ելնելով պահանջարկի մեծացումից ու հավանաբար հաշվի առնելով եկվորների՝ Ռուսաստանից լինելու հանգամանքը, բավականին բարձրացրել են գները. «Մեծամասամբ երկու սենյականոց 400-500 դոլար արժողությամբ բնակարանների գներն, օրինակ, այսօր կազմում են 1000-1200 դոլար։ Գնաճը կրկնակի է։ Բնակարանների պահանջարկը մեծ է բոլոր վարչական շրջաններում։ Սակայն պետք է նշել,որ հոսքը, համեմատած սկզբնական շրջանի, փոքր-ինչ նվազել է »,-նշում է աշխատակիցը։
Վերջինիս փոխանցմամբ՝ ռուսների կողմից գործակալություն գրեթե հավասարապես շատ են թե´ ընտանիքների, թե´ կազմակերպությունների և թե´ անհատների կողմից դիմումները։ Նա դժվարացավ տոկոսային բաժանում կատարել։
Ըստ գործակալության՝ հետաքրքիր միտում է նկատվում հետևյալ առումով. «Որոշ ռուսաստանցիներ հաճախակի ցանկություն են հայտնում ժամանակավոր բնակության համար օրավարձով 5-7 օրով ապրել Դիլիջանում, Ծաղկաձորում և այլ քաղաքներում, որից հետո նոր կգտնեն ավելի երկարաժամկետ կացության վայր, եզակի դեպքերում դիմում են նաև Աբովյան քաղաքում։
Որպես Երևանին մոտ գտնվող, տուրիստական հայտնի համայնք՝ մենք Գառնիի համայնքապետարանից հետաքրքվեցինք, թե դիմելիության ինչ պատկեր կա, ի պատասխան մեզ փոխանցեցին, որ հիմնական այցելությունները տուրիստական բնույթ են կրում։ «Բնակության համար Գառնիում քիչ են վարձակալության տրվող ազատ բնակարանները, հետևաբար այստեղ ապրող ռուս այցելուները հիմնականում բնակվում են հոսթելներում, ավելի քիչ թվով կարող են պատահել սեփական տների վարձակալություններ»,-նկատեց համայնքապետը։
