«Առաջին լրատվական»-ի զրուցակիցն է վրաց քաղաքագետ Գելա Վասաձեն։
-Պարոն Վասաձե, հետևելով իրադարձություններին նկատելի է, որ Վրաստանում հասարակության մի ստվար զանգված համաձայն չէ իշխանությունների որդեգրած քաղաքականության հետ, որի համաձայն Թբիլիսին չի միանում հակառուսական պատժամիջոցներին։ Այդ դժգոհությունները ինչի՞ կարող են հանգեցնել։
-Ստեղծված իրավիճակը ես կապում եմ Վրաստանի իշխանությունների վախկոտության և ագահության հետ։ Վախկոտությունը կպատճառաբանեմ հետևյալ կերպ․ անձամբ Բիձինա Իվանիշվիլին, որը ներկայիս իշխանության ղեկավարն է՝ վախում է Պուտինից, իսկ ագահությունը կապված է նրա հետ, որ ուզում է ստեղծված իրավիճակից շահած դուրս գալ։ Հիմա Ռուսաստանը շատ ծանր իրավիճակում է, ստիպված է իր կապիտալները դուրս բերել, փողերը թաքցնել, այդ գումարների հետևից սկսվելու է իրական որս։ Իվանիշվիլին ուզում է այս իրավիճակից օգտվել ու այդ թվում Վրաստանի միջոցով թաքցնել ռուս օլիգարխների գումարները։
Վախկոտության հետ կապված ամեն ինչ պարզ է, իսկ ինչ վերաբերում է ագահությանը, ապա դա մի փոքր հիմարություն է։ Հասկանալի է, որ դա հարուցելու է արևմուտքի դժգոհությունը և նրանց ագահությունը միայն վնասելու է երկրին։
-Ձեր դիտարկմամբ՝ հանրության ու ընդդիմադիր ուժերի դժգոհությունը ինչի՞ կարող է հանգեցնել։
-Ոչ մի բանի։ Իսկ ահա արևմուտքի դժգոհությունը կբերի նրան, որ նրանք, ովքեր կօգնեն Ռուսաստանին խուսափել պատժամիջոցներից՝ իրենք կհայտնվեն այդ պատժամիջոցների տակ ու նաև կհայտնվեն միանգամայն վատ իրավիճակում։
-Կարծում եք Վրաստանը կգնա՞ այդ քայլին, կօգնի՞ Ռուսաստանին։
-Վրաստանը՝ ո՛չ, իսկ կոնկրետ մարդիկ՝ այո՛։
-Կոնկրետ մարդիկ իշխանության մե՞ջ։
-Այո՛։
-Երկրում իրավիճակը լարվա՞ծ է ընդհանուր առմամբ։
-Իհարկե։ Տեսեք՝ այսօր Միխայիլովը հայտարարել է, որ Ռուսաստանը կարող է հրթիռային հարված հասցնել կենսալբորատորիային։ Իհարկե կենսաբանական լաբորատորիան առողջապահության նախարարության վերահսկողության տակ է, բայց դա բիոլաբորատորիա է։ Եթե նրա վրա հարված հասցվի, ապա ես շատ վատ լուր ունեմ Վրաստանի, Հայաստանի, Ադրբեջանի, միգուցե նաև Թուրքիայի ու Իրանի համար։ Հյուսիսային Կովկասի երկրները բարձր լեռներ ունեն, մի փոքր ավելի լավ է իրավիճակն այս առումով, բայց մեր երեք երկրների հետ կապված սա շատ վատ լուր է։ Սա կենսաբանական լաբորատորիա է։ Ես կարծում եմ, որ Ռուսաստանն այսօր ամբողջ աշխարհի համար մեծ վտանգ է ներկայացնում։
-Վրաստանի այսօրվա դիրքորոշումը հարված չի՞ հասցնի այդ երկրի ՆԱՏՕ-ի ու ԵՄ-ի անդամակցության հեռանկարներին։
-Այս իշխանության օրոք նման հեռանկար գոյություն չունի, բայց քանի որ հասարակությունը բոլորովին այլ կարծիք ունի, ապա իշխանության փոփոխության պարագայում նման բան հնարավոր է։ Այս իշխանության օրոք՝ ոչ, չի կարող լինել հեռանկար մի բանի, որը գոյություն չունի։
