Դեկտեմբերի 1-2-ը Ղազախստանի մայրաքաղաք Աստանայում կայանալիք գագնաթաժողովը կարող է օգնել ԼՂ խնդրի կարգավորմանը,- հայտարարել է ԵԱՀԿ հակամարտությունների կանխարգելման կենտրոնի տնօրեն Հերբերտ Զալբերը՝ հայտնում է РИА Новости-ն: Գործակալության հաղորդմամբ, նա ակնկալում է, որ գագաթնաժողովը հակամարտության կողմերի քաղաքական կամքի առաջընթացի համար կարող է ազդակ հանդիսանալ, ապա հիշեցրել է, որ «միջոցառմանը մասնակցելու են նաև Հայաստանի և Ադրբեջանի նախագահները, ինչը հնարավորություն է տալիս, որպեսզի նրանք բաց քննարկեն այդ հարցերը»:
Ապա Զալբերը հավելել է. «Բայց ինձ թվում է՝ պետք է իրատես լինել: Այդ հակամարտությունը բավականին խորն է, այն երկարատև պատմություն ունի, հավանաբար, իրատեսական չէ ակնկալել, որ խնդրի կարգավորումը կլինի այստեղ»: Ըստ կենտրոնի տնօրենի` «գագաթնաժողովում հակամարտության քննարկման արդյունքում հնարավոր է մթնոլորտի բարելավում և հակամարտության լուծման շրջանակային պայմանների առնչությամբ առաջընթացի որոշակի քայլեր»:
«Վերջիվերջո, հակամարտող կողմերը պետք է իրենք որոշում կայացնեն. ԵԱՀԿ-ն կամ Մինսկի խումբը, այլ երկրների նախագահները կամ արտգործնախարարները կարող են միայն օգնել ու աջակցել բանակցություններին»,- ընդգծել է Զալբերը: