Այսօր Ազգային ժողովի հատուկ նիստի ժամանակ տեղի ունեցավ ՀՀ 5-րդ նախագահ Վահագն Խաչատուրյանի պաշտոնաստանձման արարողությունը։
Վահագն Խաչատուրյանը նախագահ է ընտրվել Հայաստանի համար բախտորոշ ժամանակաշրջանում, երբ տեղի է ունենում միջազգային իրավակարգի փոխակերպում, որն ուղեկցվում է ռազմական լայնամասշտաբ բախումներով։
Հայաստանը, գտնվելով աշխարհաքաղաքական մարտնչող բևեռների բախման խաչմերուկում, պետք է դրսևորի անօրինակ դիվանագիտական ձեռնհասություն՝ հեռացնելու փոթորկվող աշխարհից եկող վտանգները, ապահովելու ռազմական, քաղաքական և տնտեսական կայունությունը։
Նորընտիր նախագահը կանգնած է Հայաստանի Երրորդ Հանրապետության ստեղծման ակունքներում, անցել է քաղաքական ու մասնագիտական պատկառելի ճանապարհ, զբաղեցրել է պատասխանատու պաշտոններ, իրականացրել է գիտական և փորձագիտական ակտիվ գործունեություն։
«Հանուն Հանրապետության» կուսակցությունը շնորհավորում է Վահագն Խաչատուրյանին պաշտոնաստանձնման կապակցությամբ և մաղթում է ամենայն բարիք համապետական նշանակության իր նոր կարգավիճակում։
Համոզված ենք, որ Վահագն Խաչատուրյանն իր հարուստ փորձն ու մարդկային հատկանիշներն առավելագույնս կծառայեցնի Նախագահի ինստիտուտի սահմանադրական կարգավիճակի իրացմանը և համազգային միասնության ապահովմանը։