Ինչպես հայտնում է РИА Новости-ն, ԱՄՆ պետքարտուղար Հիլարի Քլինթոնը նոյեմբերի 30-ից դեկտեմբերի 3-ը շրջագայելու է: Հ.Քլինթոնը մեկնելու է Ղազախստան, Ղրղզստան, Ուզբեկստան և Բահրեյն,- տեղեկացրել է ԱՄՆ պետքարտուղարի օգնական Ֆիլիպ Քրոուլին՝ ըստ ԱՄՆ պետքարտուղարության լրատվական ծառայության:
Ներկայացնելով պետքարտուղարի շրջագայության մանրամասները՝ Քրոուլին նշել է, որ Ղազախստանում նա ղեկավարելու է ԵԱՀԿ գագաթնաժողովում ամերիկյան պատվիրակությունը:
Գագաթնաժողովից առաջ ԱՄՆ պետքարտուղարը հանդիպելու է տեղի և միջազգային հասարակական կազմակերպությունների ներկայացուցիչների հետ: Նա նաև հանդիպելու է Ղազախստանի արտգործնախարար, ԵԱՀԿ գործող նախագահ Կանատ Սաուդաբաևի հետ։ Հանդիպման ժամանակ կքննարկվի ԱՄՆ-Ղազախստան երկկողմ հարաբերությունների զարգացման ռազմավարությունը:
Ղրղզստանում նա հանդիպում կունենա նախագահ Ռոզա Օտունբաևայի և կառավարական այլ պաշտոնյաների հետ:
Իսկ Ուզբեկստանում Քլինթոնը կհանդիպի նախագահ Իսլամ Քարիմովի հետ։ Բահրեյնում ԱՄՆ պետքարտուղարը կմասնակցի Manama Dialogue համաժողովին, որը կազմակերպում է Ռազմավարական հետազոտությունների ինստիտուտը:
