Վերլուծաբան Հակոբ Բադալյանը ֆեյսբուքյան իր էջում գրել է.
Հայաստանի և Թուրքիայի արտգործնախարարների հանդիպման բովանդակային մանրամասներ հավանաբար հայտնի կդառնան առաջիկայում: Իսկ առայժմ արարողակարգային «մանրամասների» մասին: Հայաստանի արտգործնախարարը փողկապով է, Թուրքիային՝ առանց փողկապի: Միթե՞ հանդիպումից առաջ չի եղել արարողակարգային «կոմունիկացիա», որպեսզի՝ կամ Չավուշօղլուն էլ լիներ փողկապով, կամ Միրզոյանը նույնպես լիներ առանց փողկապի:
Այլապես, արարողակարգային այդ պատկերը «հուշում» է Թուրքիայի դիրքի որոշակի «վերամբարձություն»: Իհարկե հասկանալի է նաև, որ լիովին տարբեր են երկու երկրների քաղաքական կշիռներն ու կարողությունները, բայց դա թերևս չպետք է ազդի արարողակարգային համաչափության վրա:
Առավել ևս, որ քաղաքականության մեջ արարողակարգը ամենեւին մանրուք չէ: Սրան զուգահեռ, եթե այդ կերպ իհարկե Թուրքիան կփորձի այսպես ասած կառավարել Ադրբեջանի «խանդը», ապա գուցե սա կարող է լինել արարողակարգային անհամաչափության որեւէ մոտիվ: Իսկ այն, որ Ադրբեջանի առումով այդ խնդիրը կա, թերեւս անկասկած է: Դրա մասին խոսել եմ բազմիցս, և այն ունի բավականին հասկանալի բացատրություն: Բաքուն լավ է պատկերացնում իր և Թուրքիայի հետաքրքրությունների և շահերի տրամաչափի էական տարբերությունը, հետեւաբար եւ հասկանում, որ Անկարան Հայաստանի հետ հարաբերության ուղղությամբ աշխատանքի առումով բոլորովին չունի Ադրբեջանին բացարձակ հաշվետու լինելու իրական շահագրգռություն, չնայած հրապարակային հայտարարություններին:
Գալով թեմային լայն առումով, գլխավոր հարցն իհարկե հատկապես այս փուլում հայ-թուրքական շփումներում դրական մթնոլորտի ապահովումն է, որպես ուկրաինական պատերազմով սրված անվտանգության ռիսկերի կառավարման կարեւոր բաղադրիչներից մեկը:
