Ռոման Աբրամովիչից բացի՝ Մեծ Բրիտանիայի պատժամիջոցների տակ են հայտնվել Օլեգ Դերիպասկան, Իգոր Սեչինը, Անդրեյ Կոստինը, Ալեքսեյ Միլլերը, Նիկոլայ Տոկարևը և Դմիտրի Լեբեդևը։
Մեծ Բրիտանիայի իշխանությունները պատժամիջոցներ են կիրառել ևս յոթ ռուս գործարարների և պետական ընկերությունների ղեկավարների նկատմամբ, այդ թվում՝ միլիարդատեր Ռոման Աբրամովիչի, ով լոնդոնյան «Չելսի» ֆուտբոլային ակումբի սեփականատերն է։ Այս մասին այսօր հայտնել է բրիտանական կառավարության կայքը։
Պատժամիջոցների ցանկում են նաև գործարար Օլեգ Դերիպասկան, «Ռոսնեֆտի» գործադիր տնօրեն Իգոր Սեչինը, «Գազպրոմի» գործադիր տնօրեն Ալեքսեյ Միլլերը, ՎՏԲ բանկի գործադիր տնօրեն Անդրեյ Կոստինը, «Տրանսնեֆտի» գործադիր տնօրեն Նիկոլայ Տոկարևը և «Ռոսիա» բանկի խորհրդի նախագահ Դմիտրի Լեբեդևը։
Պատժամիջոցների ենթարկված յոթ ռուսների ընդհանուր ունեցվածքը կազմում է մոտ 20 միլիարդ դոլար: Մեծ Բրիտանիայում նրանց պատկանող բոլոր ակտիվները կսառեցվեն, իսկ մուտքը երկիր՝ կարգելվի։
Տույժերը սահմանվել են՝ ի պատասխան Ուկրաինայում Ռուսաստանի ռազմական ագրեսիայի։ «Ապահով վայր չի լինելու նրանց համար, ովքեր աջակցեցին Պուտինի դաժան հարձակմանը Ուկրաինայի վրա», – ասել է Բրիտանիայի վարչապետ Ջոնսոնը։