Լուսանկարը՝ Armeniasputnik-ի
Մարտի 11-13-ը Անթալիայում անցկացվում է դիվանգիտական ֆորում, որում առաջին անգամ իր մասնակցությունը կունենա նաև Հայաստանը՝ արտգործնախարար Արարատ Միրզոյանի մակարդակով։ Հայաստանի արտաքին գերատեսչությունը, սակայն, չի հստակեցնում, թե Միրզոյանն ինչ հանդիպումներ է ունենալու Անթալիայում։ Փորձագետները, սակայն, չեն բացառում նրա և Թուրքիայի արտաքին գերծերի նախարար Մևլութ Չավուշօղլուի հանդիպումը։
Ուկրաինայի դեմ սանձազերծած պատերազմի ֆոնին Անթալիայում անցկացվող այս ֆորումը հատուկ նշանակություն է ստանում։ Ֆորումին մասնակցելու նպատակով Անթալիա մեկնած Ուկրաինայի ու Ռուսաստանի արտգործնախարարն արդեն իսկ հանդիպել են, սակայն պատերազմը դադարեցնելու պայմանավորվածություն ձեռք բերել հնարավոր չի եղել։
Թերևս հենց այս իրադարձություններն են պատճառը, որ նաև թուրքական մամուլում Հայաստանի մասնակցությունն ակտիվորեն չի քննարկվում։ «Առաջին լրատվական»-ի հետ զրույցում Ստամբուլում լույս տեսնող «Ակօս» թերթի հայերեն էջերի պատասխանատու Բագրատ Էստուկյանն ասաց, որ Հայաստանի արտգործնախարարի մասնակցությանը միանշանակ դրական է պետք վերաբերել․ «Դիվանագիտական ցանկացած շփում ինձ համար դրական զարգացում է և ես հենց այդ կոնտեքստում են սա դիտարկում»։
Էստուկյանի դիտարկմամբ՝ այսօր օրակարգային թիվ մեկ խնդիրը Ուկրաինայի ու Ռուսաստանի միջև ընթացող պատերազմն է, Ռուսաստանի և Ուկրաինայի արտգործնախարարների հանդիպումն է․ «Շատ մեծ հետաքրքրություն չկա Հայաստանի արտգործնախարարի ժամանման վերաբերյալ, ավելի շատ ուշադրությունը արտգործնախարարների հանդիպմանն է ուղղված։ Դուք գիտեք, որ Թուրքիայի արտգործնախարարն էլ առանձին-առանձին հանդիպումներ ունեցավ երկու երկրների արտաքին գերատեսչությունների ղեկավարների հետ։ Սա է պատճառը, որ մեծ ուշադրություն չի դարձվում Հայաստանի մասնակցությանը»։
Մեր զրուցակիցը համարում է, որ արտգործնախարար Միրզոյանի ժամանումը Անթալիա կարելի է դիտարկել հայ-թուրքական հարաբերությունների կարգավորման այս փուլի համատեքստում։ Սակայն, ըստ մեր զրուցակցի, այս կոնտեքստում ավելի կարևոր են Ռուբեն Ռուբինյանի ու Սեյդար Քըլըչի հանդիպումները․«Իրենք է , որ պետք է ուղղություն մշակեն։ Հետևաբար իրենց հանդիպումներն ավելի նշանակալից են, քան այսօր արտգործնախարար Միրզոյանի ժամանումն Անթալիա։ Անշուշտ դա էլ է կարևոր, որովհետև այստեղ երկկողմ շփումներ են լինելու, բայց ավելի կարևոր է բանագնացների հանդիպումը»։
Այս համատեքստում Բագրատ Էստուկյանը հիշատակեց նաև օրեր առաջ թուրք բանագնաց Քըլըչի կատարած այցն Ադրբեջան և նշեց․ «Թուրքիան ու Ադրբեջանն իհարկե այլ մակարդակի հարաբերություններ ունեն, բայց հստակ է նաև, որ այստեղ էլ կա համաձայնություն, որ Թուրքիա-Հայաստան հարաբերությունները պետք է բնականոն հունի վրա դրվեն, հետևաբար այլևս Ադրբեջանի կողմն այս հարցում խոչընդոտ չէ։ Շեշտեմ նաև, որ հայ-թուրքական երկկողմ գործընթացի մասին Թուրքիան բնականաբար ադրբեջանական կողմին տեղյակ է պահում և այդ մասին բազմիցս հայտարարվել է արտգործնախարարության կամ նախագահի պաշտոնական ներկայացուցչի կողմից»,-եզրափակեց նա։
