Ռուսաստանն այս ճգնաժամից դուրս կգա ավելի ուժեղ և ինքնաբավ, Անթալիայում իր թուրք և ուկրաինացի գործընկերների հետ հանդիպումից հետո ունեցած ասուլիսում հայտարարել է ՌԴ արտգործնախարար Լավրովը, ասելով, որ տնտեսական պատժամիջոցների ենթարկված Ռուսաստանը կձեռնարկի անհրաժեշտ քայլերը Արևմուտքից կախվածություն չունենալու համար: Ռուսաստանի Դաշնությունն այսօր հայտարարել է Եվրոպայի Խորհրդից դուրս գալու մասին: Իհարկե մինչ այդ էլ Ուկրաինա ներխուժումից հետո Եվրոպայի խորհուրդն էր կայացրել ՌԴ անդամությունը սառեցնելու որոշում: Այժմ Մոսկվան հայտարարում է խորհրդից դուրս գալու մասին:
Դատելով Ռուսաստանի դեմ կիրառվող պատժամիջոցների մասշտաբից և բնույթից, ինչպես նաև ՌԴ արձագանքից, մեծ է հավանականությունը, որ ականատես ենք ավելի խորքային ու երկարաժամկետ մի խաղի: Ընդ որում, ամեն ինչ լավ կլիներ, եթե ավարտվեր ականատեսությամբ: Մենք նաև կամա, թե ակամա լինելու ենք այդ խաղի մասնակից որևէ փուլում և որևէ տրամաբանությամբ: Եվ այստեղ իհարկե Ռուսաստանի արտգործնախարարի արտահայտությունները տալիս են մտորելու տեղ, թե ինչ կանի Մոսկվան հետխորհրդային այն գոտիներում, որոնք իր համար դիտարկում է կենսական: Մոսկվան կգնա նաև այդ գոտիներում գտնվող պետություննե՞րը Արևմուտքից անջատելու տարբերակով, թե՞ այդուհանդերձ կկենտրոնանա ռուսական «ինքնաբավության» խնդրի վրա, չփորձելով ավելորդ բեռ ստանձնել այլ երկրների «ներառումով»:
Հավանականությունը մեծ է, որ սկզբնական փուլում առնվազն Ռուսաստանը կմնա «ընդգրկուն» հավակնություններից ձեռնպահ, մինչ կփորձի կարգավորել իրավիճակը հենց Ռուսաստանի ներսում: Ինչ կլինի դրանից հետո, դա արդեն բավականին անորոշ և անկանխատեսելի է, ինչպես Ուկրաինա ներխուժման հավանականության հարցն էր: Համենայնդեպս, կա թերևս ոչ շատ տևական, սակայն որոշակի ժամանակ՝ անցանկալի, վատթար սցենարային տարբերակի պատրաստվելու համար, անկախ դրա հավանականությունից: Ընդ որում, պատրաստվելը թերևս պետք է ենթադրի նաև բովանդակային մշակումներ՝ Ռուսաստանի և Արևմուտքի հետաքրքրությունների նվազագույն այնպիսի համադրելիություն ունենալու առաջադրանքի շրջանակում, որը թույլ կտա Հայաստանը զերծ պահել «ինքնաբավության» ռուսական հավակնություններից: Իհարկե իրադարձությունների զարգացման այդ սցենարը թերևս ամենևին ամենահավանականը չէ: Առավել շոշափելի ուրվագծեր կառաջանան ուկրաինական տիրույթում ռազմական փուլի ավարտից հետո:
