Կիրակի օրը` նոյեմբերի 28-ին, ՀՀՇ երիտթևի համաժողովի ժամանակ, ՀՀՇ երիտասարդական կառույցի նոր ղեկավար է ընտրվել քաղբանտարկյալ Հարություն Ուռուտյանի որդին` Բաբկեն Ուռուտյանը:
Բաբկեն Ուռուտյանը համակարգում էր Հայ ազգային կոնգրեսի Մարալիկի տարածքային կառույցի աշխատանքները:
Ավելի քան ինը ժամ տևած համաժողովի արդյունքում ՀՀՇ երիտասարդական թևի հանրապետական խորհրդի կազմում են ընտրվել նաև երիտասարդ ակտիվիստներ Սարգիս Խաչատրյանը, Սարգիս Գևորգյանը, Լիլիթ Մելքոնյանը, Հրանտ Թամրազյանը:
Հիշեցնենք, որ համաժողովը տեղի է ունեցել ՀՀՇ երիտթևի նախագահի պաշտոնից Կարեն Կարապետյանի հրաժարականից հետո: Կարապետյանը, ի դեպ, ներկա չէր համաժողովին:
Փոխարենը համաժողովին ներկա է եղել ՀՀ առաջին նախագահ Լևոն Տեր-Պետրոսյանը, որը անսպասելիորեն նաև ելույթ է ունեցել երիտասարդների համար:
Առաջին նախագահը ի խոսքում նշել է, թե ուրախ է, որ երիտասարդությունն այդքան ակտիվ է, սակայն նաև հորդորել է երիտասարդներին, քաղաքականությամբ տարվելով, չմոռանալ նաև կրթություն ստանալու մասին:
Լևոն Տեր-Պետրոսյանը հորդորել է երիտասարդներին չդառնալ կոմսոմոլ և կրթվել:
«Մեզ համար դուք երկու առաքելություն ունեք, առաջին` ապահովել կուսակցության գաղափարական ժառանգականությունը և երկրորդ` շնչել մեր թիկունքում, թույլ չտալ, որպեսզի մենք լճանանք»,- ասել է առաջին նախագահը: