Ռուսաստան-Ուկրաինա պատերազմով պայմանավորված միգրանտների կյանքը խիստ բարդանում է, ռուսական ռուբլին սրընթաց անկում է ապրում: ՌԴ-ում մեր միգրանտների աշխատավարձը գնողունակությամբ կիսվել է. հավանական է մոտ ապագայում չկարողանան վճարել միգրանտներին։
Այս առնչությամբ, Ռուսաստանի հայ փաստաբանների ԱՐՄՌՈՍՍ ասոցիացիայի նախագահ Ռուբեն Կիրակոսյանը «Առաջին լրատվական»-ի հետ զրույցում նշեց, որ կոնկրետ իրենց կազմակերպությունում այդպիսի դիմումներ չեն եղել, պետք է սպասել, տեսնել, թե ինչ ընթացք կունենա գործընթացը:
Նրա խոսքով, Ռուսաստանը չի հրաժարվել սոցիալական և աշխատանքային ոլորտներում Ռուսաստանի և ԵԱՏՄ երկրների քաղաքացիների վերաբերյալ իր պարտավորություններից. Ես չեմ տեսել այդտեղ որևէ խստացում կամ արգելափակում: Բոլոր միջպետական պայմանագրերը գործում են, աշխատանքային շուկան գործում է, ինչքան դա հնարավոր այս պայմաններում:
Ռուբլու արժեզրկումը զուտ տնտեսական հարց է, այսինքն՝ դա ոչ միայն միգրանտների վրա է բացասաբար ազդում, այլ ողջ Ռուսաստանի տնտեսության, և ամբողջ բնակչության: Բոլորն էլ իրենց վրա կզգան դրա ազդեցությունը: Այսինքն՝ չենք կարող ասել, որ կա միգրանտների վերաբերյալ առանձին խնդիր:
Ես կարծում եմ, որ Ռուսաստանն այս ամենը նախաձեռնելուց առաջ տնտեսական հաշվարկներ, վերլուծություններ է արել, նախապատրաստվել են, և կարծում եմ՝ եթե ճգնաժամ լինի, թույլ չեն տա, որ լինի հասարակական լարվածություն սոցիալական ոլորտում»,-ասաց Ռուբեն Կիրակոսյանը:
Նա նկատեց, որ, այո՛, Ռուսաստանում տնտեսական վիճակը կտրուկ փոխվում է, և հիմա ոչ ոք չի կարող կոնկրետ կանխատեսումներ անել, թե ինչպես կլինի:
Հարցին, թե կա՞ տեղաշարժ, որ Ռուսաստանի հայերը ցանկանան վերադառնալ Հայաստան, նա պատասխանեց. «Համայնքը շատ մեծ ու բազմազան է: Մոսկվայում այդպիսի տեղեկատվական կենտրոն չկա, որը կստանա տեղեկատվությունները և կամփոփի: վատն այն է, որ սոցիալական ցանցերում հայերի մեջ կան ընդհարումներ, մասնավորապես Ռուսաստանի և Ուկրաինայի հայերի մեջ կա լուրջ անհամաձայնություն։ որոշում, որ պետք է սա անել կամ նա անել, կամ գնալ Հայաստան, չկա: Ամեն մեկն իր համար է որոշում կայացնում: Դժվար է ասել, թե որ միտումն ավելի գերակշռող կլինի:
Այսօր դեռ չենք կարող ասել, որ այս իրավիճակը կյանքի որակի վրա լուրջ ազդեցություն է թողել: Դեռ չկա նման բան, չի զգացվում: Մենք ապրելով Մոսկվայում չենք զգում, որ կենցաղային, սոցիալական ոլորտում ինչ-որ սահմանափակումներ կան»: