Իհարկե, Ռուսաստանի հայերը մասնակցում են պատերազմին, եթե մարդիկ էնտեղ ապրում են ու պատերազմ է գնում, պարզ է, որ մասնակցում են, ընդ որում, և ապստամբական խմբերում, և զինվորների մեջ կան հայեր: Այս մասին «Առաջին լրատվական»-ի հետ զրույցում նշեց Ռուսաստանի հայերի միության փոխնախագահ Լուսիկ Ղուկասյանը:
Նա նշեց, որ այս օրերին Ռուսաստանի հայերի միությունը կտիվորեն օգնություն է տրամադրում Լուգանսկի և Դոնեցկի շրջանների տարհանված բնակիչներին: Մասնավորապես, Ռոստովի մարզում տարհանված մարդկանց ՌՀՄ-ն հատկացրել է 3 տոննա սննդամթերք, Միության Կուրսի մասնաճյուղը հատկացրել է պարենով ու առաջին անհրաժեշտության իրերով լի 5 տոննա բեռ, Վորոնեժի մասնաճյուղը հյուրանոցում տեղավորել է ավելի քան 200 հոգու, որոնք տարհանվել են Լուգանսկից և Դոնեցկից: Բացի այդ, Տուլայում 10 մլն ռուբլի ուղղվել է զոհված ՌԴ զինծառայողների ընտանիքներին:
Անդրադառնալով նրան, որ այս օրերին Ռուսաստանի հազարավոր մարդիկ են գալիս Հայաստան, այդ թվում, ոչ հայեր, նա ասաց. «Հայաստան հիմնականում գալիս են քաղաքացիություն ձեռք բերելու համար: Ես շատ-շատերին գիտեմ, որ ուզում են ՀՀ քաղաքացիություն ստանալ, բայց ոչ մեկին չգիտեմ, որ ուզում է տեղափոխվել ու բնակվել Հայաստանում: իսկ քաղաքացիություն ստանալով շատերն են այս պահին հետաքրքրվում:
Մյուս կողմից մարդիկ հիմա էլ Հայաստանից գալիս են Ռուսաստան և դիմում են մեզ օգնելու խնդրանքով: Շատերը կան, որ մարդիկ Հայաստանից փախել, եկել են, ոչ աշխատանք ունեն, ոչ փող ունեն, ոչ ապրելու տեղ: Նաև որոշները շահարկում են տարբեր թեմաներ, որ փող հայթայթեն այստեղից-այնտեղից: Վերջերս մի քիչ շատացել են այդ դեպքերը»: