Կոռուպցիայի և կազմակերպված հանցավորության ուսումնասիրության կենտրոնի (OCCRP) հիմնադիր Դրյու Սալիվանն ասել է, որ Եվրասիական տնտեսական միության (ԵԱՏՄ) անդամ երկրները պետք է լքեն այն։ Հակառակ դեպքում, ըստ Սալիվանի, պատժամիջոցներ կկիրառվեն նաև այս պետությունների, ինչպես նաև Ռուսաստանի դեմ․ «ԵԱՏՄ-ն ներառում է Ռուսաստանը, Բելառուսը, Ղազախստանը, Ղրղզստանը և Հայաստանը: Փաստորեն, սա ազատ առևտրի գոտի է, ապրանքները գալիս են Չինաստանից և առանց թղթաբանության կարող են մտնել Ռուսաստան: Սա պատժամիջոցների անցք է, պետք է դուրս գան դրանից կամ. դիմակայեն նույն պատժամիջոցներին, ինչպես Ռուսաստանը», – թվիթերում գրել է Սալիվանը:
Նա նշում է, որ Ռուսաստանի Դաշնությունը կկարողանա շրջանցել պատժամիջոցները դաշնակից երկրների օգնությամբ։
«Դուք պարզապես չեք կարող պատժամիջոցներ կիրառել Ռուսաստանի դեմ, դուք պետք է նմանապես պատժամիջոցներ կիրառեք Մաքսային միության բոլոր անդամների, այդ թվում՝ Ղազախստանի, Ղրղզստանի և Հայաստանի նկատմամբ: Ռուսները կարող են ներմուծել այն ամենը, ինչ անհրաժեշտ է այդ երկրների միջոցով՝ առանց սահմանների կամ արգելքների», – բացատրում է Սալիվանը:
Քաղաքագետ Արմեն Վարդանյանի կարծիքով՝ քիչ հավանական է, որ Հայաստանը կհայտնվի պատժամիջոցների տակ, որովհետև արևմուտքում էլ շատ լավ հասկանում են, որ Հայաստանը որևէ կերպ չի աջակցել ընդդեմ Ուկրաինայի մղվող ագրեսիային․«Պատժամիջոցները հասցեական են և վերաբերում են նրանց, ովքեր այդ ագրեսիան իրականացնում են։ Ավելի կոնկրետ՝ ԵԱՏՄ անդամ երկրներից, բացի Ռուսաստանից, նաև Բելառուսի հանդեպ են սահմանվել սանկցիաներ։ Ամեն դեպքում՝ արևմուտքը շատ լավ հասկանում է, որ իմաստ չունի մյուս անդամ երկրներին էլ պատժամիջոցների ենթարկել»,-«Առաջին լրատվական»-ի հետ զրույցում ասաց նա։
Վարդանյանի դիտարկմամբ՝ այս պահին Հայաստանի հետ կապված ռիսկեր չկան, հայտարարությունն ընդամենը մեկ անձի մասնավոր կարծիք է, որը գրեթե անհնար է, որ իրականություն դառնա։
Քաղաքագետ Արմեն Հովհաննիսյանի կարծիքով՝ թեպետ Սալիվանի կարծիքը պաշտոնական չէ, Հայաստանն իրավիճակից լուրջ հետևություններ անելու կարիք ունի․«Տեսեք իրավիճակն ինչպիսին է․ հազարներով մարդիկ են գալիս, հնարավոր է որոշ կապիտալներ գան։ Եթե դրանք չեն անդրադառնա սանկցիայի տակ գտնվող ընկերություննեևրին, անհատներին, գործունեության տեսակներին, ապա կարծում եմ՝ արևմուտքի համար այնքան էլ վատ տարբերակ չէ, բոլոր դեպքերում կարող են ընկալել որպես Ռուսաստանի Դաշնության թուլացում։ Սակայն կարող եմ հարյուր տոկոսով ասել, որ մեր կառավարությունն ի վիճակի չի լինի վերահսկել իրավիճակը և այստեղ կարող ն գալ որոշակի անհատներ, գործունեության տեսակներ, որոնք թիրախավորված են արևմուտքի կողմից։ Այդ դեպքում մեր դեմ շատ հստակ գործողություններ են սկսվելու։ Հարցն այն չէ, որ Սալիվանն է այդ մասին ասել, սա օբյեկտիվ իրողություն է։ Պարոն Քերոբյանը և ցանկացած այլ պաշտոնյա չպետք է բարձրաձայն կոչեր անեն, որպեսզի գան այստեղ»,-«Առաջին լրատվական»-ի հետ զրույցում ասաց նա։
Հովհաննիսյանի դիտարկմամբ ՝ արևմուտքը «յաթաղանով կտրող չէ», նայելու են, հաշվարկելու ինչ կապիտալներ են, գործունեության ինչ տեսակներ են, ինչ նպատակ են հետապնդում ու շատ կարճ շրջանից հետո կանեն համապատասխան հետևություններ։