Ֆուտբոլի Ռուսաստանի ազգային հավաքականը զրկվեց միջազգային բոլոր մրցաշարերին մասնակցելու հնարավորությունից։ ՖԻՖԱ-ի և ՈւԵՖԱ-ի հովանու ներքո անցկացվող մրցաշարերին չեն մասնակցի նաև ռուսական ակումբները և տարբեր տարիքային հավաքականները։ ՈւԵՖԱ-ն և ՖԻՖԱ-ն երեկ կայացրին դարակազմիկ որոշում՝ մեծ ֆուտբոլից հեռացնելով Ռուսաստանին։ Երեկ առավոտյան ՖԻՖԱ-ն պաշտոնական հայտարարություն էր տարածել, բավարարվելով խիստ պատժամիջոցներով։ Մասնավորապես, ՖԻՖԱ-ն Ռուսաստանին արգելել էր օգտագործել իր դրոշն ու հիմնը ռուսական թիմերի մասնակցությամբ խաղերի ժամանակ։ Ռուսաստանի հավաքականը տնային խաղերը պետք է անցկացներ չեզոք դաշտում և առանց հանդիսականների։ Ոչ մի միջազգային մրցաշար չպետք է անցկացվեր Ռուսաստանի տարածքում։ Ռուսաստանի հավաքականը մրցումներին կարող էին մասնակցել միայն չեզոք կարգավիճակում՝ առանց դրոշի և հիմնի։
Թույլատրելի էր միայն Ռուսաստանի ֆուտբոլային միություն, և ոչ Ռուսաստան անունը։ Այս կարգավիճակով Ռուսաստանն այնուամենայնիվ հնարավորություն կունենար մասնակցելու ՖԻՖԱ-ի հովանու ներքո անցկացովղ մրցաշարերին։ Արդեն մարտի 24-ին Ռուսաստանի ազգային թիմը 2022 թվականի աշխարհի առաջնության փլեյ-օֆֆում պետք է մրցեր Լեհաստանի հետ։ ՖԻՖԱ-ի վերոնշյալ հայտարությունից հետո սակայն իրադարձությունները սկսեցին զարգանալ միանգամայն վտանգավոր հունով։ Եվրոպական տասնյակ հավաքականներ հայտարարեցին, որ ոչ մի դեպքում չեն մրցի Ռուսաստանի դեմ։ Պաշտոնական հայտարարություններով հանդես եկան Լեհաստանի, Չեխիայի, Շվեդիայի, Նորվեգիային, Ուելսի, Շվեյցարիայի և այլ երկրների ֆուտբոլի ֆեդերացիաներ։ Արդեն փետրվարի 28-ի երեկոյան ՖԻՖԱ-ն վերանայեց որոշումը ֆուտբոլային աշխարհում հասունացող քաուսից խուսափելու համար։ ՖԻՖԱ-ն ըստ էության հարկադրաբար զրկեց Ռուսաստանին իր հովանու ներքո անցկացվող մրցաշարերին մասնակցելու իրավունքից։ Այս խնդրի շուրջ ՈւԵՖԱ-ի դիրքորոշումը ի սկզբանե ավելի ռադիկալ էր։ Ռուսաստանի զինված ուժերի կողմից Ուկրաինա ներխուժումից հետո միջազգային հեղինակավոր լրատվամիջոցները գրում էին, որ ՈւԵՖԱ-ն կհեռացնի Ռուսաստանին իր մրցաշարերից։ Չբավարարվելով այս քայլով ՈւԵՖԱ- որոշում է կայացրեց խզեը ռուսական «Գազպրոմ» ընկերության հետ համագործակցությունը բոլոր մրցաշարերում։ Համագործակցությունը խզելու որոշումն ուժի մեջ է մտնում անմիջապես և վերաբերում է բոլոր պայմանավորվածություններին, ներառյալ Չեմպիոնների լիգային, ՈՒԵՖԱ-ի հովանու ներքո անցկացվող ազգային մրցումներին և Եվրո 2024-ին:
«Գազպրոմը» Չեմպիոնների լիգայի պաշտոնական հովանավորն է 2012 թվականից։ Անցյալ տարի ընկերությունը նոր պայմանագիր է կնքել ՈւԵՖԱ-ի հետ մինչև 2024 թվականը։ «Գազպրոմը» ստացել է հովանավորչական իրավունքներ 2024 թվականի Եվրոպայի առաջնության, այդ մրցաշարի որակավորման փուլի և 2021 և 2023 թվականների Ազգերի լիգայի եզրափակիչ փուլերի համար։ ՖԻՖԱ-ի և ՈւԵՖԱ-ի համատեղ որոշումից հետո համաշխարհային ֆուտբոլում կստեղծվի նոր իրավիճակ։ Եվրոպական ֆուտբոլի խոշոր տերություններից մեկը հայտնվեց լուսանցքում։ Բնական է, դարակազմիկ որոշման հետևանքով ՖԻՖԱ-ն ու ՈւԵՖԱ-ն ֆինանսական լուրջ կորուստներ կկրեն, բայց․․․։ ՖԻՖԱ-ին ու ՈւԵՖԱ-ին չհաջողվեց ֆուտբոլը զերծ պահել քաղաքականությունից։ Ֆուտբոլային գերատեսչություններն ըստ էության կայացրին քաղաքական որոշում, որի հետևանքով կտուժեն հազարավոր մարզիկներ և միլիոնավոր երկրպագուներ։ Նշված կառույցների կողմից ավելի մեղմ որոշումը, սակայն, կհանգեցներ քաոսի։
Ստեղծված իրավիճակում եվրոպական ընտանիքն ավելի ուժեղ գտնվեց։ Արձանագրենք թերևս հետևյալը․ Ռուսական ագրեսիայի պատճառով ծանր հարված ստացավ նաև սպորտը։ Ավելին ռուսական ֆուտբոլը, ռուսական մյուս մարզաձևերը հայտնվեցին նոկդաունում և դժվար է ասել երբ կկարողանան ոտքի կանգնել։ Առաջիկա տարիներին ֆուտբոլի Ռուսաստանի հավաքականին չենք տեսնի խոշոր մրցաշարերում։ Չենք տեսնի նաև հայտնի ռուս մարզիկներին։
