ՄԱԿ-ի Անվտանգության խորհուրդը կիրակի օրը քվեարկել է Ուկրաինայի հարցով ՄԱԿ-ի Գլխավոր ասամբլեայի արտահերթ նստաշրջան անցկացնելու օգտին։ Բանաձևին կողմ է քվեարկել ԱԽ 11 անդամ, դեմ՝ Ռուսաստանը (քանի որ քվեարկությունը ընթացակարգային է, տվյալ դեպքում մշտական անդամի քվեարկությունը վետո չէ), երեքը ձեռնպահ են մնացել՝ ներառյալ Չինաստանը։
Վերջին անգամ ՄԱԿ-ի Գլխավոր ասամբլեայի արտահերթ նստաշրջանը գումարվել է 1997 թվականին՝ կապված պաղեստինյան տարածքներում տիրող իրավիճակի հետ։
Քաղաքական մեկնաբան Հակոբ Բադալյանը կարծում է, որ Հայաստանը դիրքորոշումը ՄԱԿ-ի Գլխավոր ասամբլեայում սպասվող հնարավոր բանաձևերի քվեարկության ժամանակ կախված կլինի նաև այդ բանաձևերի բովանդակությունից․ «Կա երկու հանգամանք․ առաջինն այն է, որ Ռուսաստանին վերաբերող հարցերում Հայաստանը հասկանալի պատճառով զգուշավոր է։ Անկախ մեր ցանկություններից ու կողմնորոշումներից՝ մենք պատկերացնում ենք քաղաքական ու անվտանգության հարցերում Ռուսաստանի ազդեցությունն ու այն բարդ իրավիճակը, որ այսօր կա Կովկասյան տարածաշրջանում ու որը կարող է էլ ավելի բարդանալ՝ հաշվի առնելով Ուկրաինայում տեղի ունեցող պատերազմը։ Եվ երկրորդ այն է, որ մենք այդ կարգի քվեարկություններում միշտ հաշվի ենք առնում դրանց բովանդակության նախադեպային հնարավոր ազդեցությունը՝ հաշվի առնելով այն, որ մենք ունենք նաև արցախյան խնդիր։Մենք միջազգային բանաձևերում քվեարկելից դիտարկում ենք նաև այդ հանգամանքը, որ մեր քվեարկությունը հետո չդառնա մեր դեմ օգտագործվելիք միջոց՝ Արցախի հարցում դիրքորոշումներում ու միջազգային գործընթացներում։ սա ևս մի գործոն է, որը Հայաստանն այդ քվեարկությունն հաշվի է առել»,-«Առաջին լրատվական»-ի հետ զրույցում ասաց նա։
Բադալյանի դիտարկմամբ՝ շատ բան է կախված նրանից, թե ինչ բովանդակությամբ բանաձև կարող է ընդունվել․«Ըստ այդմ՝ Հայաստանը մնա ձեռնպա՞հ, թե՞ դեմ քվեարկի։ Անշուշտ բովանդակությունը նշանակություն ունի, որովհետև ամեն ինչ կախված է նրանից, թե այդ բովանդակությունը ինչքանով կարող է մեր դեմ օգտագործվել արցախյան հարցում։ Միևնույն ժամանակ մենք շատ լավ հասկանում ենք, որ Ռուսաստանի պահն այստեղ իսկապես զգայուն է՝ հատկապես հիմա, երբ Ուկրաինայում պատերազմ է գերբարձր աշխարհաքաղաքական խաղադրույքներով։ Եվ այստեղ Հայաստանի դիրքորշումներով զգուշավորության աստիճանը էլ ավելի բարձր պետք է լինի։ Միևնույն ժամանակ գլխավոր խնդիրն այն է, որ Հայաստանը պետք է փորձի մնալ առավելագույնս չեզոք դիրքում՝ ուկրաինան խնդրի առումով։ Բայց իհարկե նաև հասկանալի է, որ կա Ռուսաստանի ազդեցության գործոնը»։
Մեր զրուցակցի խոսքերով՝ Հայաստանի համար չափազանց կարևոր է պահել այնպիսի դիրքորոշում, որ ավելորդ ագրեսիվություն չառաջացնի Ռուսաստանի մոտ Հայաստան-արևմուտք հարաբերության հարցում․ «Որովհետև Հայաստան-արևմուտք հարաբերության հարցում էականն այն չէ, որ մենք ՄԱԿ-ում կամ որևէ տեղ քվեարկենք այնպես, ինչպես հաճո կլիներ կամ դուր կգար արևմուտքին կամ որը կլիներ արևմտյան թրենդի շրջանակում։ Հայաստանի համար շատ կարևոր է այդ արարողակարգային հարցերից դուրս պահպանել Հայաստան-արևմուտք իրական աշխատանքի հնարավորությունը և չտալ առիթներ, որ Ռուսաստանը հավելյալ խնդիրներ առաջ բերի այդ իրական աշխատանքի առումով»,-եզրափակեց նա։
Հայաստանի Եվրոպական կուսակցության նախագահ Տիգրան Խզմալյանն «Առաջին լրատվական»-ին փոխանցեց, որ վարչապետի ու արտախորհրդարանական ուժերի վերջին հանդիպման ընթացքում Հայաստանի քվեարկությունների հարցը բարձրացվել է․ «Մեծամասնությունը համաձայն էր այն կարծիքին, որ Հայաստանը ոչ մի դեպքում չպետք է մասնակցի որևէ քվեարկությունը, որը կլինի հօգուտ մարդակեր պետությանը։ Իհարկե հարցը բարձրացվել է ընդդիմադիր կուսակցությունների կողմից, մենք որոշումներ կայացնող չենք, բայց պետք է նշեմ, որ իմ և իմ գործընկերների փաստարկները համոզիչ էին»։
Ի՞նչ հետևանքներ կունենա հօգուտ Ռուսաստանի քվեարկությունը Հայաստանի համար, հարցին ի պատասխան, Խզմալյանն ասաց․ «Մի այսպիսի օրինակ բերեմ։ Երեկ Միացյալ Նահանգները շատ անսպասելի քայլ կատարեց՝ Պեկինից պահանջելով արտահայտել պաշտոնական դիրքորոշում Ռուսաստանի գործողությունների վերաբերյալ։ Դա իսկապես աննախադեպ մի բան է, երբ մի գերտերություն մյուսին այդպիսի պահանջ է ներկայացնում՝ երրորդի վերաբերյալ։ Պահ է գալու, երբ պատմության դասագրքերում բոլորի այսօրվա դիրքորոշումները հիշատակվելու են։ Բնականաբար այն ինչ Վաշինգտոնն ասում է Պեկինին, ասում է Պեկինին, դա Երևանին չի ասվում։ Բայց հայտնի առակը հայերը երևի թե գիտեն։ Ինչ ասվում է Միացյալ Նահանգների կողմից՝ պատահական չէ։ Մենք պարտավոր ենք դիրքորոշում հայտնել, ընդդեմ արևմուտքի որևէ քայլ անելը կործանարար կլինի Հայաստանի համար»։
