Թուրքագետ Ռուբեն Մելքոնյանը «Առաջին լրատվական»-ի հետ զրույցում նշեց, որ թուրքական կողմը իր տարբեր բարձրաստիճան պաշտոնյաների միջոցով (նախագահ Աբդուլա Գյուլ, վարչապետ Էրդողան, արտգործնախարար Դավութօղլու) տևական ժամանակ է՝ հայտարարում է, թե ընթանում է «լուռ դիվանագիտություն» Հայաստանի և Թուրքիայի միջև: «Ես կարծում եմ, որ այդ «լուռ դիվանագիտություն» եզրը թուրքական քաղաքական մեքենայի կողմից շրջանառության մեջ է դրվել այն պատճառով, որ ավելի քիչ որոշակիություն է պահանջում և թուրքական իշխանություններին թույլ է տալիս մանևրելու ավելի լայն դաշտ ունենալ ու խուսափել կոնկրետ հարցերից և պատասխանատվությունից: Դա արվում է հայ-թուրքական գործընթացը փակուղի մտցնելուց հետո արդարանալու ճանապարհ գտնելու ինչ-որ հույսով: Ես կարծում եմ՝ որևէ լուռ դիվանագիտություն գոյություն չունի, և մեր ԱԳՆ-ն էլ քանիցս հերքել է դա»,- զրույցի ժամանակ նշեց թուրքագետը: Ըստ Ռուբեն Մելքոնյանի` սուտը, կեղծիքը, փաստերի խեղաթյուրումը շարունակում են մնալ թուրքական քաղաքական մշակույթի անբաժանելի մասը: «Առաջին լրատվականը» հետաքրքվեց, թե ինչպե՞ս է Ռուբեն Մելքոնյանը վերաբերվում այն փաստին, որ շաբաթներ առաջ Թուրքիան Հայաստանին հանել է իր ազգային անվտանգությանը սպառնալիք համարող երկրների ցանկից: Թուրքագետը կարծում է, որ Թուրքիայի քաղաքականությունը Հայաստանի նկատմամբ կրում է իմիտացիոն բնույթ, և քարոզչական տարբեր հնարքներ են գործադրվում: Թուրքիայի կատարած այդ քայլի մեջ Ռուբեն Մելքոնյանը տեսնում է մի քանի ենթատեքստ: Նա նկատեց, որ Թուրքիայի ազգային անվտանգության փաստաթուղթը գաղտնի է, և եթե տեղեկատվության արտահոսք է լինում, հիմնականում քարոզչական բնույթ է ունենում: Այդ քայլով, ըստ թուրքագետի, Թուրքիայի իշխանություններն ուզում են ցույց տալ, որ իրենք հավատարիմ են իրենց հռչակած արտաքին քաղաքականության տեսլականին, այն է`չունենալ խնդիրներ հարևանների հետ: Եվ այդ իսկ պատճառով էլ, մեր զրուցակցի հավաստմամբ, գրեթե բոլոր հարևաններին, բացի Հունաստանից, Թուրքիան դուրս է հանել իր համար վտանգ ներկայացնող երկրների ցանկից` դրանով ջանալով ապացուցելով, թե հարևանների հետ իրենք ուզում են ունենալ զրո խնդիրներ: Մյուս կողմից էլ, թուրքագետի դիտարկմամբ, Թուրքիան ցանկանում է հարվածել Հայաստանի և Սփյուռքի միասնականությանը և անջրպետ մտցնել հայության երկու հատվածների միջև: Ռուբեն Մելքոնյանը նշեց, որ Թուրքիայի արտգործնախարարը իր դեսպանների միջոցով հայտարարել է, որ տարբեր երկրներում չեզոքացնեն հայկական Սփյուռքի գործունեությունը: Մեր զրուցակիցը չբացառեց, որ թուրքական կողմը կարող է ժամանակ անց հայտարարել, թե Հայաստանին հանել է իր համար վտանգ ներկայացնող երկրների ցանկից, սակայն Սփյուռքը շարունակում է մնալ այդ ցանկում: Ինչ վերաբերում է հայ-թուրքական արձանագրությունների տապալմանը, ապա, ըստ մեր զրուցակցի, դրա պատճառը Թուրքիայի ներքին խնդիրներն են: Թուրքագետը կարծում է, որ Հայաստանը չպետք է հանդես գա համարժեք արձագանքով և Թուրքիային հանի իր ազգային անվտանգությանը սպառնալիք համարվող երկրների ցանկից, քանի որ այդ տեղեկատվությունը ստույգ չէ:
