Գեղարքունիքի մարզի Գավառի համայնքապետարանում կայացավ «Համայնքների խոշորացման գործընթացը Գեղարքունիքի մարզում, խոշորացման ընթացքը, փոփոխություններն ու խնդիրները» խորագրով մարզային քննարկումը, որն իրականացվում է «Մասնակցային ժողովրդավարությունը գործողության մեջ» ծրագրի շրջականկներում։ Հանդիպում-քննարկումը տեղի ունեցավ Եվրոպական Միության ֆինանսական աջակցությամբ՝ «Քաղաքական երկխոսություն» եւ «Մարտունու կանանց համայնքային խորհուրդ» ՀԿ-ների հետ գործընկերությամբ։ Քննարկմանը ներկա էին Գեղարքունիքի մարզպետարանի, հասարակական կազմակերպությունների, ՏԻՄ-երի, ԶԼՄ-ների ներկայացուցիչներ եւ ակտիվ քաղաքացիներ։ Բացման խոսքով հանդես եկավ Մարտունու կանանց համայնքային խորհուրդ» ՀԿ նախագահ Անահիտ Գեւորգյանը։
Քննարկման ընթացքում ներկայացվեցին եւ քննարկվեցին համայնքների խոշորացմանն առնչվող խնդիրները եւ դրանց լուծմանն ուղղված առաջարկություններն ու գաղափարները։
Գեղարքունիքի մարզում խոշորացված համայքներում առկա գործընթացների եւ ի հայտ եկած խնդիրների մասին զեկուցումներով հանդես եկան Գեղարքունիքի մարզպետարանի տեղական ինքնակառավարման եւ հանրապետական գործադիր մարմինների տարածքային ծառայությունների համակարգման վարչության պետ Վանիկ Հարությունյանը եւ Գավառ համայնքի ղեկավարի առաջին տեղակալ Գրիգոր Դաշտոյանը։ «Գեղարքունիքի մարզում համայնքների խոշորացման գործընթացը ավարտվել է 2021 թվականի դեկտեմբերի 5-ի ընտրությունների արդյունքում։ Այժմ ընթանում է գույքագրում, օրենքով սահմանված այլ ընթացակարգեր, արդեն ընդունվել են Սեւան եւ Գավառ խոշորացված համայնքների բյուջեները։ Այս ռեֆորմը բավականին դժվար էր մեզ համար, սակայն անհրաժեշտ՝ տեղական ինքնակառավարումն ավելի արդյունավետ դարձնելու համար։ Կարծում եմ, որ ի հայտ եկած բոլոր թերություններն ու դժվարությունները կկարգավորվեն ժամանակի ընթացքում»,-ներկայացրեց Վանիկ Հարությունյանը։
