ՌԴ նախագահ Պուտինը պաշտպանության նախարար Շոյգուին և ԳՇ պետ Գերասիմովին հանձնարարեց հատուկ ռեժիմի բերել ռազմավարական զսպման սպառազինությունը, նշելով, որ ուկրաինական հարցում ՆԱՏՕ երկրների դիրքորոշումները ուղիղ սպառնալիք են Ռուսաստանի հասցեին: Սա նշանակում է, որ Պուտինը հրահանգում է հատուկ ռեժիմի բերել միջուկային սպառազինությունը: Ի՞նչ է դա՝ շանտա՞ժ, թե՞ միջուկային պատերազմի իրական սպառնալիք, որին կարող է գնալ Ռուսաստանը, եթե Ուկրաինայում բախվի ռազմական և ռազմա-քաղաքական անհաղթահարելի խնդիրների և սկսի տանուլ տալ Պուտինի ուկրաինական «արշավը»: Արևմուտքն արձագանքել է, որ իր դիրքորոշումներում չկա Ռուսաստանին ուղղված որևէ ուղիղ սպառնալիք: Եթե աշխարհում Ռուսաստան չի լինելու, ապա մեզ հետաքրքիր չէ այդ աշխարհը, մի առիթով հայտարարել է Պուտինը: Դա բլե՞ֆ է, թե՞ նա իսկապես ընդունակ է համաշխարհային աղետի: Ո՞վ ունի այդ հարցի պատասխանը:
Նախօրեին ուշ գիշերը պատրաստվում էր Ուկրաինայի և Ռուսաստանի պատվիրակությունների բանակցություն ռուս-բելառուսական սահմանին: Պուտինի սպառնալիքի պատճառն Ուկրաինայում ռազմարշավի առաջին օրերին անարդյունավետությու՞նն է, դրված նպատակների և ժամանակացույցի «խախտու՞մը», թե՞ մեկնարկող կամ մեկնարկելիք, դիտարկվելիք բանակցային գործընթացին ընդառաջ Արևմուտքի ազդեցության հնարավոր նվազեցումը: Ակնհայտ է, որ Ուկրաինայի նախագահ Զելենսկին Մոսկվայի ուղղությամբ քաղաքական մոտեցումները կառուցում է ԱՄՆ ու Եվրամիության երկրների առաջնորդների հետ զուգահեռ շփումներով: Պուտինին կարող է նյարդայնացնել այդ հանգամանքը և ռազմավարական զսպման սպառազինությունը հերթապահության հատուկ ռեժիմի բերելու նրա հայտարարությունը կարող է լինել փորձ այդ հարցում Արևմուտքի դերակատարումը նվազեցնելու համար: Իհարկե հնարավոր է նաև իրավիճակի հակառակ պատկերը, երբ Պուտինն այդպիսով փորձում է հենց ԱՄՆ-ին բերել խոսակցության դաշտ, ինչի մասին էր նաև ՌԴ անվտանգության խորհրդի հատուկ նիստը, որտեղ ՌԴ բարձրաստիճան պաշտոնյաները իրենց կարծիքն էին արտահայտում Դոնբասի ու Լուգանսկի ճանաչման անհրաժեշտության կամ նպատակահարմարության մասին, խոսելով, որ գլխավորը ԱՄՆ-ն է և բանակցելն իմաստ ունի Վաշինգտոնի հետ: Հնարավոր է, որ Պուտինին նյարդայնացնում է այն, որ պատերազմի բռնկումից հետո ԱՄՆ-ը հրաժարվել է Ռուսաստանի հետ խոսելուց: