Նոր հայտարարությունները միայն շարունակում են այն ագրեսիվ հռետորաբանությունը, որը մենք տեսել ենք Ռուսաստանի կողմից հատկապես վերջին շաբաթների ընթացքում։ Այս մասին CNN-ի եթերում հայտարարել է ՆԱՏՕ-ի գլխավոր քարտուղար Յենս Ստոլտենբերգը՝ անդրադառնալով զսպող ուժերը հատուկ ռեժիմի բերելու մասին Ռուսաստանի Դաշնության նախագահ Վլադիմիր Պուտինի հայտարարությանը։
«Նրանք ոչ միայն սպառնում են Ուկրաինային, այլև ՆԱՏՕ-ի դաշնակից երկրներին, և պահանջում, որ մենք հեռացնենք մեր բոլոր ուժերը դաշինքի արևելյան շրջաններից։ Սա ընդամենը դրա մի մասն է և ընդամենը ընդգծում է ՆԱՏՕ-ի դաշնակիցների միասնականության կարևորությունը, և հենց դա էլ պատրաստվում ենք անել»,- ասել է նա։
«Ես ողջունում եմ, որ [ՆԱՏՕ] դաշնակիցները օգնում են Ուկրաինային լրացուցիչ ռազմական տեխնիկայով, ֆինանսական և մարդասիրական աջակցությամբ։ Ինքնապաշտպանությունը ՄԱԿ-ի կանոնադրությամբ ամրագրված իրավունք է, և դաշնակիցներն օգնում են Ուկրաինային պահպանել այդ իրավունքը: Սա հստակ ուղերձ է այն մասին, որ ՆԱՏՕ-ն լիակատար աջակցում է Ուկրաինայի ինքնիշխանությանը և տարածքային ամբողջականությանը»,-նշել է Ստոլտենբերգը
