Ուկրաինա ներխուժելու պատճառով Ռուսաստանի դեմ ուղղված խստագույն տնտեսական, ֆինանսական, նաև՝ ռազմական պատժամիջոցների օրեցօր խստանալուն զուգահեռ տպավորիչ անկում է շարունակում գրանցել ռուսական ազգային աժույթը՝ ռուբլին։
Գաղտնիք չէ, որ Ռուսաստանը հանդիսանում է Հայաստանի գլխավոր առևտրային գործընկերը թե´ ներմուծման, թե՛ արտահանման գծով։ «Առաջին լրատվական»-ը փորձել է պարզել՝ ընդամենը մի քանի օրվա մեջ ինչ է տեղի ունենում արտահանման շուկայում։
Արտահանողների միության նախագահ Րաֆֆի Մխչյանի փոխանցմամբ՝ ռուս-ուկրաինական պատերազմը և դրա հետևանքով Ռուսաստանի նկատմամբ Արևմուտքի կողմից կիրառվող պատժամիջոցներն այս կարճ ժամանակում հասցրել են արդեն իրենց բացասական հետևանքները թողնել հատկապես արտահանման վրա։ «Աստվա´ծ տա շատ արագ վերջանա այս արհավիրքը, որովհետև երկարելու դեպքում մենք շատ տխուր, վատթարագույն իրավիճակում ենք հայտնվելու»,-ընդգծեց միության նախագահը։
Անձամբ զբաղվելով գործարարությամբ, ունենալով սուրճի բիզնես և արտահանելով՝ Մխչյանն «Առաջին լրատվական»-ին իրավիճակը փորձեց բացատրել՝ ներկայացնելով իր բիզնեսի հետ կատարվածը. այն է, որ ՌԴ-ի իր գործընկերոջ կողմից նախապես ամրագրած պատվերը այս մի քանի օրվա մեջ չեղարկվել է հասկանալի պատճառաբանությամբ. օրեցօր խստացող պատժամիջոցների և բռնկված անկանխատեսելի պատերազմի հետևանքով ռուբլին կտրուկ և շարունակական անկման մեջ է, դրամը չի փոխվել, ուստի մեր ապրանքն այլևս թանկ է իրենց համար և ձեռնտու չէ։
Նշենք, որ Վիճակագրական կոմիտեի համաձայն՝ 2021 թվականին Հայաստանը Ռուսաստան է արտահանել 847 մլն դոլարի ապրանք, որը 2020-ի համեմատ աճել է 24.5%-ով։ Ռուսաստան Հայաստանից արտահանվում են գինի, կոնյակ, վերամշակված գյուղմթերք, մսամթերք և այլն:
Նրա համոզմամբ՝ բացի հանքահումքային նյութերի արտադրությունից, որոնք ռուսական շուկա դուրս չեն գալու, մնացած բոլոր ոլորտները տուժելու են՝ և´ խմիչքների,և´ գյուղմթերքի, և´ մսամթերք,կաթնամթերք արտադրողները,իսկ նշվածներից առավելապես տուժելու են միջին և փոքր բիզնեսն ու գյուղոլորտը։ « Ռուսական շուկան հաստատապես մեր ապրանքին փոխարինող այլընտրանք կգտնի կարճ ժամանակում, քանի որ բարեբախտաբար դեռևս մեր դրամը կայուն է և միտում չունի ընկնելու, և պետք է մտածել մեր ապրանքների իրացման խնդիրը լուծելու մասին»։
Հարցին՝ ի՞նչ պետք է անել, եթե Աստված մի արասցե, կողմերը ցանկալի համաձայնության չգան և երկարատև լինեն պատժամիջոցները, Մխչյանն ի պատասխան նշեց, որ գոյատևել փորձելու համար պետք է ստիպված մեր ապրանքերի գները նվազեցնենք որակի կամ թե այլ զիջումների հաշվին և փորձենք։
Խնդրի լուծման տարբերակներից խոսելով՝ նա ցանկացավ ընդգծել, որ այս անախորժ երևույթները Հայաստանի արտահանման շուկայում այսպիսի ընդգրկվածություն ու ցավալիություն չէր ունենա, եթե մեր տնտեսության գրեթե բոլոր ոլորտներն այդքան շատ կախվածության մեջ չլինեին ՌԴ-ից։ «Ինչպես բազմիցս եմ ասել, խնդրի լավագույն լուծումը տնտեսության այլաբևեռությունը ապահովելու, արտահանման այլընտրանքային շուկաներ գտնելու մեջ է, պետք է վաղօրոք մտածել ու լուծել այդ հարցը, սակայն, դժբախտաբար, մեզ մոտ մինչև դանակը ոսկորին չի հասնում, չենք զբաղվում խնդրի լուծմամբ»։
Մխչյանը մեզ հետ զրույցում ցանկացավ ներկայացնել նաև վերջին ժամերին ոլորտում տեղի ունեցող անցքերը՝ պատմելով, որ նոր է Մոսկվայում ավարտվել Խմիչքների էքսպո-ցուցահանդեսը, որին մասնակից հայ գործարարներին հաջողվել է բազմաթիվ պայմանագրեր կնքել, սակայն տարակուսած են՝ այս իրավիճակում ի՞նչ գնով պետք տեղի ունենա արտահանումը, ինչ վիճակի կհասնի դրամ/ռուբլի/դոլար փոխարժեքի տատանումը,հետևաբար ինչ եկամուտներ կարող են ակնկալել,կունենա՞ն նվազագույն շահույթ։ Ամեն ինչ անորոշ է ու անկանխատեսելի, և դա երևում է նաև ռուսական կողմի ներկայացուցիչների շփոթության մեջ. չեն հասկանում ինչքան կտևի այս վիճակը։ «Բայց արդեն տեսանելի է դառնում, որ եթե անգամ այս օրվա գործողությունները երկար չտևեն, ապա պատժամիջոցները կշարունակվեն նույն խստությամբ ոչ մի լավ բանի ակնկալիք չպետք է ունենանք»,-եզրափակեց Մխչյանը։
