Արևմուտքն արդեն հայտարարել է ռուսական մի շարք բանկերի (այդ թվում հայկական մասնաճյուղ ունեցող) դեմ պատժամիջոցներ սահմանելու մասին։ Միաժամանակ կտրուկ արժեզրկվել է ռուսական ռուբլին, ինչը նշանակում է, որ Ռուսաստան արտահանվող հայկական ապրանքները ավելի քիչ մրցունակ են դառնալու: Ինչպե՞ս կազդեն ՌԴ-ի դեմ նոր պատժամիջոցները Հայաստանի տնտեսության վրա, մասնավորապես, ռուսական կապիտալով հայկկան բանկերի վրա:
Այս հարցերի շուրջ «Առաջին լրատվական»-ը զրուցել է Էկոնոմիկայի նախկին նախարար Արմեն Եղիազարյանը հետ: Նա նշել է, որ դեռ պետք է հասկանալ, թե պատժամիջոցները տարածվում են ռուսական բանկերի վրա՞, թե՞ Ռուսաստանում գործող բանկերի. «Իրենց համար տեխնիկապես բարդ է պատժամիջոցներ կիրառել ռուսական բանկերի վրա, որոնք ՌԴ տարածքում չեն: Իրենք պետք է վերցնեն Ռուսաստանում գործող բանկերը և SWIFT-ից հանեն: Հայաստանի այն բանկերի համար, որոնք ռուսական կապիտալ չունեն, դա շատ էլ լավ է: Մեր հնարավորություններն այդ դեպքում ավելանում են: Եթե մեր նկատմամբ չկիրառեն պատժամիջոցներ, իսկ ես կարծում եմ՝ չեն կիրառի, ապա լավ է»:
Հարցին, թե այդուհանդերձ, ինչն կլինի հայկական բանկային համակարգի հետ, Եղիազարյանը պատասխանեց. «Չեմ կարծում, որ պրոբլեմ լինի, կծախեն ինչ-որ մեկին, ֆորմալ առումով բանկի ձևը կփոխեն: Ես համոզված չեմ, որ պատժամիջոցները ռուսական կապիտալի վրա է տարածվելու, որովհետև ռուսական կապիտալը միլիոն տեղերում կա: Կարծում եմ՝ Ռուսաստանում գործող բանկերի, այնտեղի կապիտալի մասին է խոսքը: Չեն նայելու, որ այս բանկը, որ գտնվում է դրսում, ունի ռուսական կապիտալ: Կարող են դա էլ անել, բայց քիչ հավանական է»:
Ինչ վերաբերում է «ՎՏԲ Հայաստան» բանկին, տնտեսագետը նկատեց. «ՎՏԲ Հայաստանը» ինքնուրույն հայկական բանկ է, որը պատկանում է ՎՏԲ-ին, ինչպես օրինակ HSBC-ն: Կարծում եմ, մեր բանկերի վրա չի ազդի, բայց եթե ազդի էլ, մնացած բանկերը պակասը կլրացնեն»:
Ինչ վերաբերում է ՌԴ-ից Հայաստան եկող տրանֆերտների ծավալներին, որը ՀՀ տնտեսության մեջ մեծ ազդեցություն ունի, Արմեն Եղիազարյանն ասաց. «Տրանսֆերտները կապված են Ռուսաստանի տնտեսության վիճակի հետ, եթե ռուսական տնտեսությունն ընկնի, տրանսֆերտները կկրճատվեն: Դժվար է ասել, ինչպես կլինի, եթե նավթն ու գազը փակեն, դա կազդի, եթե չփակեն, սարսափելի բան չի լինի: Իհարկե, Ռուսաստանը SWIFT-ից անջատելը լավ բան չի, դա վատ կլինի ռուսների համար»:
Նա համոզմունք հայտնեց, որ այս ամենը Հայաստանի տնտեսության վրա լրջագույն ազդեցություն չի կրի, նոր հնարավորություններ կհայտնվեն:
«Փոխարենը, ռուբլու արժեզրկումը բոլորովին լավ չի մեզ համար, եթե ռուբլին արժեզրկվում է, մեր արտահանումը թանկանում է, մեր իշխանությունները համապատասխանաբար, պետք է դրամն իջեցնեն, որովհետև Ռուսաստանը մեր ամենամեծ գործընկերն է: Ամեն դեպքում կապրենք, կտեսնենք, դժվար կանխատեսելի է, թե ինչ կլինի: Կարող է շատ վատ լինել, կարող է համեմատաբար տանելի լինել»»,-ընդգծեց տնտեսագետը:
