ՌԴ նախագահ Վլադիմիր Պուտինն իրանական կողմի նախաձեռնությամբ հեռախոսազրույց է ունեցել Իրանի նախագահ Սեյեդ Էբրահիմ Ռայիսիի հետ:
Պուտինը տեղեկացրել է Ուկրաինայի շուրջ իրավիճակի զարգացումների մասին, նաև մանրամասներ հայտնել Դոնբասում հատուկ ռազմական գործողությունների վերաբերյալ: Իր հերթին Իրանի նախագահն ըմբռնում է հայտնել ԱՄՆ-ի և ՆԱՏՕ-ի ապակայունացնող գործողությունների պատճառով Ռուսաստանի՝ անվտանգության մտահոգությունների վերաբերյալ։
Այս առնչությամբ ՄԱՀՀԻ ասոցացված փորձագետ, իրանագետ Էմմա Բեգիջանյանը «Առաջին լրատվական»-ի հետ զրույցում նկատեց, որ Իրանը այս դեպքում հստակ դիրքորոշում չի հայտնել, չի ասել, որ Ռուսաստանին պաշտպանում է կամ Ուկրաինային քննադատում է. «Կարելի է ասել, որ Իրանի կողմից հստակ դիրքորոշում չկա, Իրանը զգուշավոր է այս հարցում: Բնական է, որ Իրանը ՆԱՏՕ-ին պետք է քննադատեր, Արևմուտքին պետք է քննադատեր, բայց հստակ չի ասել, որ պաշտպանում է Ռուսաստանին»:
Հարցին, թե ինչո՞վ է պայմանավորված Իրանի զգուշավորությունը, Բեգիջանյանը պատասխանեց. «Իրենց դիվանագիտությունն է այդպիսին:
Տեսեք, հիմա ընթանում են Վիեննայի բանակցությունները Իրանի միջուկային ծրագրերի շուրջ: Գուցե Իրանի դիրքորոշումը բացասաբար անդրադառնա այդ բանակցությունների վրա, որը կարծես, վերջին փուլում է, կարծես գալիս են համաձայնության: Բացի այդ, Իրանը Ուկրաինայի հետ էլ հարաբերություններ ունի: Դրա համար իրենց դիրքորոշումը չպետք է միակողմանի ռուսամետ լինի։ Այսինքն այն կարող է լինել հակաարևմտյան, բայց ոչ ռուսամետ: Դրա համար Իրանի դիրքորոշումը զգուշավոր է, նա չի ուզում իր հարաբերություններն ավելի սրել, լարել Արևմուտքի հետ: Որքան հետևել եմ իրանական մամուլին, այնտեղ նույնպես զգուշավորությունը պահում են: Մյուս կողմից, նկատելի է, որ Ուկրաինայի շուրջ իրադարձությունների հետ կապված իրենք միայն ռուսական տեղեկատվությունից չեն օգտվել, այլ նաև արևմտյան լրատվամիջոցների տեղեկատվությունից»: