ԲԴԽ նախագահի հրամանով նախատեսված Դատավորների արտահերթ ընդհանուր ժողովը չկայացավ, քանի որ ներկա էր ընդամենը 89 դատավոր, քվորում չապահովվեց:
Օրակարգում քննարկման էր դրված դատավոր Բորիս Բախշիյանի նկատմամբ իրականացվող քրեական հետապնդման, ինչպես նաև դատական իշխանության և դատավորների նկատմամբ իրականացվող ճնշումների հարցը։
Դատավորների միության նախագահ Ալեքսանդր Ազարյանը, անդրադառնալով մամուլի հրապարակումներին,թե իբր դատավորների նկատմամբ ճնշումներ են եղել, որ չներկայանան նիստին, ասաց.«Ի՞նչ ճնշում, որ ժողովը չկայանա՞, ինձ որևէ մեկը չի ահազանգել, որ փորձում են ճնշում գործադրել, նման ահազանգեր չենք ստացել»:
Անդրադառնալով ընդհանուր ժողովի՝ արտահերթ նիստի չեղարկմանը՝՝ փաստաբան Լուսինե Հակոբյանը «Առաջին լրատվական»-ի հետ զրույցում ասաց. «Դատավոր Բորիս Բախշիյանի գործը հիմա դատարանում է, և եթե իրենք հավաքվեն, ինչ-որ հայտարարություններ ընդունեն, դիրքորոշումներ արտահայտեն, իրենք հետագայում կաշկանդված կլինեն այդ գործով որևէ դատական ակտ կայացնելու հարցում, քանի որ դա ինքնաբացարկի հիմք է: Ես կարծում եմ, որ եթե դատավոր Բախշիյանի հարցով է եղել ընդհանուր ժողովը, մեծամասնությունը շատ խելացի է գտնվել, որ չի ներկայացել»:
Անդրադառնալով դատավորների՝ պարբերաբար արվող հայտարարություններին, թե իրենց և դատական համակարգի նկատմամբ ճնշումներ կան, փաստաբանը նշեց, որ տարիներ շարունակ էսպիսի դեպքերում իրենք միշտ ասել են, որ կա իրավապահ համակարգ, այդ իրավապահ համակարգը զբաղվում է այդ գործերով, նախաքննություն է ընթանում և այլն:
«Ամեն անգամ տարբեր գործերով դա է եղել իրենց պատասխանը: Հիմա ո՞րն է տարբերությունը, որ այս դեպքում նախաքննությունը դատավորի՞ նկատմամբ է ընթանում, պետք է դատավորի նկատմամբ նախաքննություն չընթանա՞: Թող իրենք համբերությամբ զինվեն, սպասեն, մինչև գործը կհասնի դատարան, գոնե այդ ժամանակ կարծիքներ հայտնեն: Ընդհանրապես իրավաբանության հետ անհամատեղելի է այս փուլում վեր կենալ ու կարծիքներ հայտնել այդ թեմայով»,-հավելեց Լուսինե Հակոբյանը:
Հարցին՝ դատավորների նկատմամբ ճնշումներ չեք նկատո՞ւմ, փաստաբանը ասաց, որ չի կարող ասել, քանի որ ինքը դատական համակարգի ներսում չէ:
«Մենք՝ փաստաբաններս, երբ մեր նկատմամբ են եղել ճնշումներ, ազդեցության տարբեր միջոցներ, մենք միջոցներ ձեռնարկել ենք կոնկրետ իրավական խողովակներով: Իրենք որպես դատավորներ պետք է իմանան այդ իրավական խողովակները որոնք են և այդպես ընդհանուր բնույթի հայտարարություններով չբավարարվեն, այլ կոնկրետ միջոցներ ձեռնարկեն: Եթե համարում են, որ իրենց իրավունքները խախտվում են, թող ձեռքի տակ եղած իրավական խողովակներով պայքարեն»,-հավելեց նա:
Փաստաբանի խոսքով՝ դատավորները օրենքից դուրս չեն, իրենք պետք է ենթարկվեն օրենքին, իրենք անձեռնմխելի կաստա չեն, որ ինչ-որ բաներ կատարեն, բայց այդ գործողությունների վերաբերյալ որևէ մեկը հարց չտա, քրեորեն չհետապնդվեն, եթե նման պատասխանատվության հարց է ծագում, և իրենք ևս դա պետք է ընդունեն: «Երևի դատավորները բժիշկների նման համարում են, որ իրենք սուպեր մարդկային համայնք են, չպետք է որևէ պատասխանատվության ենթարկվեն և ազատորեն գործեն ամեն մեկն ըստ իր սկզբունքների ու հայեցողությունների, բայց օրենքը բոլորի համար է»,-ասաց փաստաբանը: