Բրյուսելում տեղի ունեցող հանդիպումները հնարավորություն կտան եվրոպական առաջնորդներին որոշելու այն պատժամիջոցները, որոնք կիրառվելու են Ռուսաստանի նկատմամբ Ուկրաինայի վրա հարձակվելու համար։ Այդ մասին Հայաստանում Ֆրանսիայի դեսպանատանը տեղի ունեցող միջոցառման ժամանակ հայտարարեց ՀՀ-ում Ֆրանսիայի արտակարգ և լիազոր դեսպան Անն Լույոն։
Միջոցառումը նվիրված է Հայաստան-Ֆրանսիա դիվանագիտական հարաբերությունների հաստատման 30-ամյակին, ներկա են մի շարք բարձրաստիճան պաշտոնյաներ, այդ թվում` Հայաստանի կառավարության անդամներ, օտարերկրյա դեսպաններ։
Դեսպան Անն Լույոն իր ելույթի սկզբում նշեց, որ սա շատ ուրախ և երջանիկ օր է Հայաստանի և Ֆրանսիայի համար, և իրենք հավաքվել են այս կարևոր տարեդարձը տոնելու, սակայն այն, ինչ տեղի է ունենում այս օրերին և հատկապես այն, ինչ նախորդ գիշեր եղավ Ուկրաինայում, թույլ չի տալիս չանդրադառնալ այդ իրադարձություններին։
Դեսպանը իր խոսքում շեշտեց, որ վերահաստատում է Ֆրանսիայի և Եվրամիության համերաշխությունը ուկրաինացի ժողովրդին։ «Բրյուսելում տեղի ունեցող հանդիպումները պետք է հնարավորություն տան որոշելու այն խիստ պատժամիջոցները, որոնք պետք է կիրառվեն, և ես վերահաստատում եմ Ֆրանսիայի և Եվրամիության համերաշխությունը ուկրաինացի ժողովրդին», – հայտարարեց Հայաստանում Ֆրանսիայի դեսպանը։
