Օրեր առաջ ռուս-ուկրաինական լարվածության ֆոնին Դոնբասից Ռուսաստան էր անցել 10 հազար 356 մարդ, այս թիվը այսօր արդեն սկսված ռուս-թուրքական պատերազմից հետո շարունակական աճ է գրանցում։ Հատկապես ԴՈնի Ռոստովում են հաստատվում փախստականները։
Դոնի Ռոստովում բնակվող լրագրող, արևելագետ, «Антитопор» նախագծի հեղինակ Վադիմ Հարությունովըը «Առաջին լրատվական»-ի հետ զրույցում նշեց. «Դեռևս մեր համայնքին որևէ մեկը չի դիմել հայերից. Այո՛, փախստականները շատացել են, որոնց տեղավորում են հանրակացարաններում, ճամբարներում, այլ վայրերում, բայց մեր համայնքին դեռ չեն դիմել: Ես կարծում եմ, որ հայերը կամ մնացել են այնտեղ, կամ տեղափոխվել են այլ վայրեր՝ իրենց հազարատների մոտ: Եթե մեզ չեն դիմել, նշանակում է ինքնուրույն իրենց խնդիրները լուծել են»:
Անդրադառնալով իրենց քայլերին՝ Վադիմ Հարությունովը նշեց, որ գործում են ըստ իրավիճակի. «Մարդիկ տարբեր են, տարբեր սոցիալական պայմաններ ունեն: Լուգանսկից ու Դոնեցկից փախստականների մի մասը տեղափոխվում է հարազատների տուն, մի մասը ֆինանսների կարիք ունի, մի մասը կացարանի խնդիր ունի, որտեղ կարող է ժամանակավոր բնակվել: Դրանից կախված էլ հայ համայնքն օգնում է մարդկանց: Համենայնդեպս, այդպես է եղել առաջին պատերազմի ժամանակ: Բայց այս անգամ դեռ չեն դիմել, որ հասկանանք, թե ինչ է պետք: Այդ առումով Ռոստովի հայ համայնքը միշտ էլ ակտիվ է եղել և՛ Արցախի հարցում, և՛ Ուկրաինայի հարցում, և՛ ֆինանսապես է օգնել, և՛ այլ ձևերով»:
Վադիմ Հարությունովը կոչ արեց հայկական լրատվամիջոցներին զգույշ լինել այս իրադարձությունները լուսաբանելիս. «Մենք այստեղ կարդում ենք նաև հայկական մամուլը: Ես կապեր ունեմ նաև Կիևի հայերի հետ: Ես խնդրում եմ, որ հայկական լրատվամիջոցները շատ զգույշ լուսաբանեն այս ամենը, որովհետև հայեր ապրում են ինչպես Ուկրաինայում, այնպես էլ Ռուսաստանում: Եվ եթե որևէ մեկը անզգուշորեն ինչ-որ հոդված է գրել, ադրբեջանական կայքերը դա անմիջապես ուղարկում են Ուկրաինա կամ Ռուսաստան: Սա մեր հակամարտությունը չէ: Ուրաինան չմիջամտեց, երբ Արցախում պատերազմ էր, ավելին, նրնք ադրբեջանցիներին էին աջակցում: Դա պետք է հիշենք, բայց նաև պետք է հիշենք, որ Ուկրաինայում հայեր են ապրում»,-հավելեց Հարությունովը:
