Այսօր վաղ առավոտյան Ռուսաստանը ներխուժել է Ուկրաինա։ ՌԴ նախագահ Պուտինը հայտարարել է Դոնբասում հատուկ ռազմական գործողություն սկսելու մասին: Բազմաթիվ քաղաքներ ենթարկվել են հարձակման, ցամաքային ուժերը Ուկրաինա են մտնում Ռուսաստանի և Բելառուսի տարբեր դիրքերից:
Ռուսաստանի հայերի միությունը հայտարարություն է տարածել, որտեղ նշված է, որ միությունն իր աջակցությունն է հայտնել ԴԺՀ-ի և ԼԺՀ-ի անկախությունն ու ինքնիշխանությունը ճանաչելու ՌԴ նախագահ Պուտինի որոշմանը և նրանց հետ բարեկամության, համագործակցության ու փոխօգնության մասին պայմանագրի կնքմանը․ «ՌՀՄ-ն իր համերաշխությունն է հայտնում Դոնեցկի ու Լուգանսկի բնակիչներին: Ստեղծված իրավիճակում մենք այդ քայլը միակ հնարավոր միջոցնե ենք համարում այդ հանրապետությունների բնակիչներին պաշտպանելու և անվտանգությունն ապահովելու համար։
Մենք դիմում ենք մեր հայրենակիցներին ամբողջ աշխարհում. հանդես բերեք օբյեկտիվություն իրավիճակը գնահատելիս և համերաշխություն Դոնեցկի ու Լուգանսկի հանրություններին, որոնց մի մասն են կազմում այդ հանրապետությունների հայ համայնքները: Այդ հանրապետություններում 10 հազար հայ է ապրում, որոնք մյուսների պես բախվում են մարդասիրական ու այլ մարտահրավերների»,-նշված է հայտարարության մեջ:
Ռուսաստանի հայերի միության փոխնախագահ Լուսիկ Ղուկասյանն «Առաջին լրատվական»-ի հետ զրույցում նշեց, որ փախստականների հարցով պետությունը բավականին կազմակերպված ձևով զբաղվում է․ «Մենք կապի մեջ ենք և՛ Դոնեցկի, և՛ Լուգանսկի սահմանամերձ հատվածների հայ համայնքների հետ, մենք այնտեղ ներկայացուցչություններ ունենք: Ում ինչ օգնություն հարկավոր է, ցուցաբերում ենք: Պետությունը նաև լուրջ զբաղվում է այդ հարցերով: Մենք մեզնից կախված ամեն ինչ անում ենք, առաջին անգամ չէ, որ մենք սկսել ենք օգնել, երևի տեղյակ եք, որ ամեն տարի մենք Դոնեցկի ու Լուգանսկի բոլոր մանկատների երեխաներին, ինչպես նաև հայ համայնքներին օգնություններ ենք ցուցաբերել: Ամեն Նոր տարի դերասաններ ենք ուղարկել, ամենալավ դահլիճներում իրենց համար ամանորյա միջոցառումներ ենք կազմակերպել, նվերներ են ուղարկել: Մեր ներկայացուցչությունն այնտեղ ակտիվ աշխատում է»,-ասաց Ղուկասյանը: Նա նշեց, որ Հայաստան մեկնելու դեպքեր չեն եղել, իսկ Ռուսաստան կազմակերպված գալիս են:
«Այս պահին բոլոր տեղափոխվողների հարցերը լուծվում են: Ավելի ճիշտ կլինի հյուպատոսարանից ճշտել՝ իրենց դիմո՞ւմ են Հայաստան գնալու համար, թե ոչ»,-ասաց Լուսիկ Ղուկասյանը՝ հավելելով, որ Մոսկվայում և ՌԴ մյուս տարածաշրջաններում վերջին ժամանակներս Հայաստանի եկողներն են շատացել, անգործ, անփող գալիս են, օգնություն են խնդրում, ասում են մնալու տեղ չունենք, աշխատանք չունենք, նաև Հայաստանից են գալիս, ներկայանում են Արցախում կռվածներ:
