Հայաստանի Հանրապետության կրթության, գիտության, մշակույթի և սպորտի նախարարության ֆինանսական աջակցության շնորհիվ ամբողջությամբ վերանորոգվել է Երևանի պարարվեստի պետական քոլեջի փորձասենյակը:
Լուսանկարները` Մխիթար Խաչատրյանի
Փետրվարի 23-ին ՀՀ ԿԳՄՍ փոխնախարար Արա Խզմալյանն այցելեց քոլեջ՝ ծանոթանալու կատարված աշխատանքին:
«Առանց հարիր պայմանների, առանց բարենպաստ միջավայրի, չի կարելի խոսել որակյալ կրթության մասին: Երբ ասում ենք որակյալ կրթություն, մեթոդաբանությանը, բովանդակային խնդիրներին զուգահեռ պետք է հաշվի առնել նաև տեխնիկական, գույքային պայմանները: Ե՛վ նախորդ տարի, և՛ այս տարի մեծ ներդրումներ են արվում թատերահամերգային կազմակերպություններում: Այս տարի 1 մլրդ դրամ հատկացվելու է թատերահամերգային կազմակերպությունների կապիտալ վերանորոգմանը, լուսաձայնային տեխնիկայի արդիականացմանը»,-նշեց Խզմալյանը:
Նրա խոսքով՝ այժմ թատրոնների տնօրենների հետ քննարկումներ են իրականացնում և պատրաստվում են մասնագետների գործուղել Գերմանիայում կայանալիք մեծ ցուցահանդեսին, որն անմիջական կապ ունի լուսաձայնային տեխնիկայի, բեմական պարագաների, բեմի կահավորման և այլնի հետ: Ըստ փոխնախարարի՝ մենք պետք է տեղյակ լինենք, թե աշխարհում այսօր ինչ է կատարվում, ինչ է արտադրվում, որովհետև 21-րդ դարում մասնատել գեղարվեստական կրթական որակը այդ որակն ապահովող նյութատեխնիկական բազայից, դժվար է:
Արա Խզմալյանը մի քանի անգամ հանդիպել է Ալ. Սպենդիարյանի անվան օպերայի և բալետի ազգային ակադեմիական թատրոնի, Երևանի Կոմիտասի անվան պետական կոնսերվատորիայի և Երևանի պարարվեստի պետական ուսումնարանի ղեկավարների հետ և համագործակցության վերաբերյալ պայմանավորվածություններ են ձեռք բերվել, որովհետև և՛ ուսումնարանում, և՛ կոնսերվատորիայում սովորողները պետք է համալրեն Օպերային թատրոնի արտիստների շարքերը: «Մեր խնդիրը ոչ միայն պրոֆեսիոնալ պարողներ ունենալն է, բեմական խորեոգրաֆիան, այլև բեմական փորձը: Ցանկանում ենք ուսումնարանում ձևավորել մի միջանկյալ օղակ, հարթակ, որը պարողին փորձ ձեռք բերելու հնարավորություն կտա: Պարը միայն մասնագիտական գործունեության խնդիր չէ, այլ ապրելու, շարժվելու մշակույթ է, սա աշխարհայացք է, կենցաղի գեղագիտություն է, շատ ավելին է, քան ենթադրվում է, և երբ մենք մեր սերունդներին կրթում ենք, մշակում կեցվածք, մշակում ենք վաղվա գեղեցիկ քաղաքացուն, իսկ մարմնի գեղեցկությունը պակաս կարևոր չէ հոգու գեղեցկությունից: Պոլ Վալերին ասել է, որ իրեն երբեմն թվում է, որ մեր հոգին ոչինչ չի հասկանում մեր մարմնից: Ուզում եմ, որ մենք այդ սխալը չգործենք»,-շեշտեց Արա Խզմալյանը:
Քոլեջի տնօրենի ժամանակավոր պաշտոնակատար Հասմիկ Մարկոսյանը նկարագրելով փորձասենյակի նախկին վիճակը, նշեց՝ փայտե հատակը փտած էր, շարքից դուրս եկած և անհնար էր այդտեղ պարապել:
«2020 թվականի դեկտեմբերին ՀՀ կառավարության որոշմամբ մենք դրամաշնորհ ստացանք: Ամբողջ հատակն ապամոնտաժվեց՝ ոչ միայն վերին շերտը, այլև հիմնափայտերը: Նոր հատակ կառուցվեց, հղկվեց: Մասնագիտական լինոլեում ենք ձեռք բերել, որովհետև հիմա միայն լինոլեումի վրա են պարապում, փայտի վրա աշխարհում այլևս ոչ ոք չի պարապում: Պարասրահն այժմ շատ հարմար է: Բոլոր մեծ կուրսերը, բազմամարդ կուրսերը կարողանում են այս պարասրահում աշխատել»,-շեշտեց նա:
Առաջիկայում Պարարվեստի պետական քոլեջի տնօրենի ընտրությունն է կայանալու: Մանրամասները կհայտնի ՀՀ ԿԳՄՍ նախարարությունը: