ՌԴ նախագահ Վլադիմիր Պուտինը կոչ է արել ամենախիստ միջոցները ձեռնարկել անօրինական միգրանտների և Ռուսաստանի օրենքները խախտողների դեմ: Նա խոստացել է՝ դաժան հետևանքներ կլինեն նաև հանցավոր խմբերի համար, որոնք իրենց հանցավոր բիզնեսը կառուցում են անօրինական միգրացիայի վրա։ Ցանկացած օրենքի խախտում կամ ապօրինի աշխատանքային գործունեություն Ռուսաստանից արտաքսման և ապագայում ՌԴ մուտքի արգելքի մասին որոշումների արագ ընդունման համար հիմք են հանդիսանալու։
Հիշեցնենք, որ ՌԴ-ում դեկտեմբերի 29-ից սկսած աշխատանքային բոլոր միգրանտները պետք է պարտադիր մատնադրոշմում անցնեն։
Ռուսաստանում գտնվող հայ միգրանտները, եթե պարտավոր են մուտքի պահից 30-օրյա ժամկետում անցնել բուժզննում՝ 9 հիվանդություններով, հանձնել մատնահետք, սքանավորել ափը, եթե չունեն մշտական գրանցում։ Իրականում այս դեպքում էլ մի շարք խնդիրներ են առաջանում, քանի որ մատնահետք չեն կարողանում հանձնել, քանի որ տարբեր բժշկական կենտրոններ, հատկապես ՌԴ ծայրամասերում, չունեն համապատասխան սարքեր։
«Հայկական կարիտաս» ՀԿ միգրացիոն ծրագրի փորձագետ Տաթևիկ Բեժանյանը «Առաջին լրատվական»-ի հետ զրույցում նշեց, որ դեռևս նախորդ տարվա փետրվարին ինքը տեղեկացրել էր, որ 63 կետից բաղկացած փոփոխություններ են նախատեսվում Ռուսաստանի միգրացիոն օրենսդրության մեջ. «Դրա մեջ մտնում են, օրինակ, պետության հետ լոյալության համաձայնագիր կնքելը, ID քարտ ունենալը, որը հնարավորություն է տալու հետևել միգրանտին, ես ավելի քան վստահ եմ, որ սա հիմք է ստեղծում այդ փոփոխություններն ուժի մեջ մտցնելու համար: Այդ փոփոխությունները ուժի մեջ են մտել դեկտեմբերի 29-ին: Նոր սկսել են կիրառվել այդ փոփոխությունները, հետևաբար, սրա հետ կապված դեռ որևէ արձագանք չկա: Շատ ավելի ուշ կարող ենք արձագանքների մասին խոսել»,-ասաց նա:
Դիտարկմանը, որ փաստը, որ Պուտինի մակարդակով արձագանք կա միգրացիոն օրենսդրության փոփոխություններին, ենթադրելի է, որ դա ազդեցություն ունենալու է միգրանտների, այդ թվում հայ միգրանտների վրա, Բեժանյանն ասաց. «Իհարկե, և հիմա հող են նախապատրաստում այդ փոփոխությունները կիրառության մեջ դնելու համար: Պուտինի այդ հայտարարությունը, միանշանակ կարող եմ ասել, կապ ունի Ուկրաինայում պարտվելու հետ: Այդ պարտությունից հետո ներքին լսարանի համար նոր թշնամի է պետք, ամենահարմար տարբերակը միգրանտներն են:
Հունիսի դրությամբ մենք ունեինք 61 հազար հայ միգրանտ, երբ պաշտոնական տվյալներով նրանք դարձել էին անօրինական: Հիմա թե նրանց թիվը որքան է, կդժվարանամ ասել»:
Նա մի քանի թվային տվյալներ բերեց 2021 թվականին միգրացիոն շրջանառության վերաբերյալ. «2021-ի ընթացքում 578 779 ՀՀ քաղաքացի օրինական միգրացիոն հաշվառման է կանգնել ՌԴ տարածքում: Նրանցից 389 809-ը եղել են աշխատանքի նպատակով մեկնածները: Դեկտեմբերի 31-ի դրությամբ հայ միգրանտներից 426 254-ը արդեն միգրացիոն հաշվառումից դուրս էին եկել: Այսինքն՝ նրանք ամենայն, հավանականությամբ, լքել էին երկրի տարածքը: Եթե իմ նշած 587 հազարից հանենք այս թիվը, կտեսնենք, թե որքանն են մնացել ՌԴ տարածքում:
Այստեղ մեկ ուրիշ կա մտահոգող, որ 2021 թվականին 46 931 անձ ստացել է ՌԴ քաղաքացիություն: Սա ավելին է, քան նախորդ 5-6 տարիների ընթացքում»,-ասաց Տաթևիկ Բեժանյանը:
