«Առաջին լրատվական»-ի զրուցակիցն է «Արդար Հայաստան» կուսակցության նախագահ, փաստաբան Նորայր Նորիկյանը
Պարոն Նորիկյան, 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի արդեն երկրորդ նիստն է տեղի ունեցել: Հիմա արտախորհրդարանական ուժերի ներկայացուցիչները համաձայնել են հանձնաժողովում լինել առանց ձայնի իրավունքի՞, թե՞ ձայնի իրավունք ունենալու են: Ինչպե՞ս է դա կարգավորվել:
Նման բան չի կարող լինել, որ մենք առանց ձայնի իրավունքի այդ հանձնաժողովում աշխատանքային գործունեություն ծավալենք: Դա իմ պարագայում բացառված է, կարծում եմ՝ մյուսների պարագայում՝ նույնպես: Մ«ենք ակնկալում ենք, որ քննիչ հանձնաժողովն առաջիկա օրերին կհստակեցնի ու կներկայացնի այն իրավասությունների շրջանակն ու լիազորությունների ծավալը, որի շրջանակներում մենք աշխատելու ենք և ըստ այդմ էլ, մենք մեր վերջնական դիրքորոշումը կարտահայտենք: Ես ինքս ակնկալում եմ, որ մեր լեգիտիմության, մեր իրավական անխոցելիության շրջանակը կներկայացվի քննիչ հանձնաժողովի կողմից, որպեսզի որևէ մեկի կողմից որևէ շահարկում թույլ չտրվի մեր գործունեության լեգիտիմության առումով: Ինչ վերաբերում է աշխատանքին, բնականաբար, դեռ վաղ է այդ մասին խոսելը: Ակնհայտ է, որ այս հանձնաժողովն ունի լրջագույն դերակատարություն, և ակնկալում ենք, որ հանձնաժողովի գործունեությունը կտա շատ ու շատ հարցերի պատասխան, բայց ես ուզում եմ, որ մեր հանրությունը լեգիտիմ ակնկալիք ունենա հանձնաժողովից այն առումով, որ այդ հանձնաժողովն ընդամենը Սահմանադրությամբ ամրագրված իրավակարգավորումների համատեքստում փաստերի պարզման լիազորություն ունեցող, այդ փաստերի պարզման վերաբերյալ համապատասխան եզրակացություններ անելու հանձնաժողով է, ոչ ավելին: Ուրիշ լիազորություն այդ հանձնաժողովը չունի: Չունի իրավունք որևէ մեկին մեղավոր նշանակելու, որևէ մեկին պատժելու, և ես ակնկալում եմ, որ մեր հանրությանը կներկայացվի այդ հանձնաժողովի իրական հնարավորությունների վերաբերյալ օբյեկտիվ տեղեկատվություն, որպեսզի վերջնարդյունքում մեր հանրությունը հերթական անգամ կոտրած տաշտակի առջև չկանգնի այն առումով, որ այլ բան էր ակնկալում հանձնաժողովից, բայց այլ վերջաբանի ականատես եղավ:
-Դուք այդ հանձնաժողովի ղեկավար կազմի հետ խոսե՞լ եք: Նշվում է, որ այդ հանձնաժողովում արտախորհրդարանական ուժերի մասնակցություն ապահովելու համար ԱԺ կանոնակարգ օրենքում պետք է փոփոխություն լիներ, որ ձայնի իրավունք ունենար: Քանի դեռ այդ փոփոխությունը տեղի չի ունեցել, ինչպիսի՞ իրավունքներ կտան արտախորհրդարանական ուժերին:
-Ընդամենը մեկ բան ասեմ։ Հաշվի առնելով հանձնաժողովի առանձնահատկությունը, գաաղտնիության բաղադրիչը, ձեռնպահ կմնամ լրացուցիչ տեղեկատվություն հայտնելուց, բայց վստահեցնում եմ ձեզ, որ իմ կողմից ձեր բարձրացրած հարցերի վերաբերյալ հրավիրվել է իրավասու շրջանակի ուշադրությունը և անկեղծ ասում եմ, որ ես որևէ անօրինական գործընթացի չեմ մասնակցելու։ Ինձ համար շատ հստակ է, ակնկալվում է, որ հանձնաժողովը կներկայացնի այն իրավասությունների և իրավական հիմքերի շրջանակը, որի շրջանակներում ես անձամբ մասնակցություն կունենամ։ Եթե ես զգացի, որ այնտեղ իմ մասնակցությունը կամ գործունեությունը լեգիտիմ չէ կամ կասկածի տակ է դնում առնվազն իրավական տեսանկյունից, հետևողական կլինեմ իմ դիրքորոշումը ներկայացնելու տեսանկյունից։
Այսօր որևէ բովանդակային հարց չի քննարկվել, ընթացակարգային է եղել, և կարծում եմ, որ դեռևս ամեն ինչ առջում է, և տեսանելի ապագայում մենք կունենանք հնարավորություն առավել բովանդակային քննարկելու։
-Անձամբ Դուք ի՞նչ ակնկալիքներ ունեք այդ հանձնաժողովից, երբ խորհրդարանական ընդդիմությունը չի մասնակցում, իսկ արտախորհդարանական ընդդիմության հետ կապված դեռ պարզ չէ, թե որքան հնարավորություն կտրվի։
-Ես հորդորում եմ խորհրդարանական ընդդիմությանը լիարժեքորեն ընդգրկվել այս գործընթացում, սա ՀՀ ապագայի համար կարևորագույն գործառույթ է, և անկախ քաղաքական դիրքորոշումներից, մեկը մյուսի նկատմամբ ունեցած վերապահումներից ես ակնկալում եմ, որ այս գործընթացին ներգրավի քաղաքական առավել լայն շերտ, որպեսզի մենք կարողանանք պետության համար աղետի վերածված պատերազմական գործողությունների վերաբերյալ արդյունքներ ունենալ։
