Սիրիայի նախագահ Բաշար Ալ-Ասադը ելույթ է ունեցել տեղական հեռուստաընկերությամբ և հայտարարել, որ մտահոգված է Սիրիա արտաքին ուժերի հնարավոր ռազմական ներխուժումից: Նա մասնավորապես ասել է. «Սիրիայի դեմ ցանկացած գործողություն շատ ծանր հետևանքներ կունենա: Նախ՝ մեր երկրի աշխարհաքաղաքական դիրքի և երկրորդ՝ Սիրիայի հնարավորությունների շնորհիվ»:
Ինչպես հայտնում է «Ալ-Ջազիրան», Ասադը խոսել է նաև երկրում սպասվող փոփոխությունների մասին, որոնք, ըստ նրա, արվում են ոչ թե Արևմուտքի ճնշումներին տեղի տալով, այլ Սիրիայի ժողովրդի պահանջին ընդառաջ: Ըստ gazeta.ru-ի՝ Ասադն իր հրաժարականի մասին Օբամայի և միջազգային հանրության կոչն անիմաստ է որակել` հայտարարելով, որ առնվազն 6 ամիս է անհրաժեշտ բարեփոխումներ իրականացնելու համար:
Սիրիայի նախագահը շեշտել է, որ ոչ ինքը, ոչ էլ իր կառավարությունը հրաժարական չեն տա:
Ասադը նշել է, որ 2012 թ. փետրվարին երկրում կանցկացվեն խորհրդարանական ընտրություններ: Բաշար Ասադը նաև նշել է, որ կառավարական զորքերը պայքարում են երկիրը ահաբեկչական զինված խմբավորումներից ազատելու համար և ոչ թե խաղաղ ցուցարարների դեմ, ինչպես հայտնում են մի շարք լրատվամիջոցներ:
Նախագահի ելույթից անմիջապես հետո ողջ երկրում սկսվել են զանգվածային նոր ելույթներ: Ասադի ելույթն առաջինն էր այս տարվա հունիսի 20-ից հետո:
Տեղեկացնենք՝ rosbalt.ru-ն հայտնում է, որ Ճապոնիան Սիրիայից հետ է կանչել իր դեսպանին:
