Բուլղարական Պլովդիվ քաղաքում մեկնարկել է Շախմատի Եվրոպայի ակումբային գավաթի խաղարկությունը, որին մասնակցում է ավելի քան 40 թիմ: Հայաստանն այս մրցաշարին ներկայացնում է «Միկա-Երեւան» թիմը, որի կազմում են մեր Օլիմպիական հավաքականի անդամներ Լեւոն Արոնյանը, Վլադիմիր Հակոբյանը, Գաբրիել Սարգսյանը, Արման Փաշիկյանը եւ եւս չորս մասնակից: Վարկանիշով մեր թիմը 7-րդն է: Առաջինն է ադրբեջանական «SOCAR Azerbaijan»-ը, որի կազմում են Շախրիյար Մամեդյարովը, Թեյմուր Ռաջաբովը, Աեքսանդր Գրիշչուկը:
Կիրակի եւ երկուշաբթի տեղի է ունեցել երկու փուլ, որից հետո 11 թիմ գրանցել է 100%-անոց արդյունք: Մեր թիմն առաջին փուլում հաղթել է «LugPokerChess – Lugansk» ուկրաինական թիմին` 5.5:0.5, իսկ երկրորդում` իսրայելական «Beer Sheva CC»-ին` 4.5:1.5 հաշվով:
Երրորդ փուլում մեր թիմին ավելի լուրջ փորձություն է սպասվում : «Միկա-Երեւան»-ը հանդիպելու է մրցաշարում երկրորդ վարկանիշն ունեցող «St.Petersburg Chess Club» թիմի հետ, որտեղ հանդես են գալիս Վասիլի Իվանչուկը, Պիտեր Սվիդլերը, մեր հայրենակից Սերգեյ Մովսեսյանը:
