Հայաստանում կորոնավիրուսի համավարակով պայմանավորված բոլոր սահմանափակումները կրում են ժամանակավոր բնույթ և ուղղված են կոնկրետ որոշակի խնդիրներ լուծելուն: Այս մասին լրագրողների հետ ճեպազրույցում ասաց ՀՀ Առողջապահության նախարար Անահիտ Ավանեսյանը:
Նա նշեց, որ մասնագիտական թիմը այս պահին քննարկում է 2022 թվականի մարտի 1-ից սպասվող նոր փոփոխությունների հարցը: Վերլուծությունից հետո՝ առաջիկա շաբաթվա ընթացքում, կիրազեկեն, թե որ սահմանափակումները կմնան, որոնք դուրս կգան:
Անդրադառնալով պատվաստանյութերին՝ նախարարը ասաց, որ նոր տեսակի պատվաստանյութերի նկատմամբ ավելի մեծ է հետաքրքրությունը, բայց պահպանվում է մյուս պատվաստանյութերի ակտիվ օգտագործումը:
«Այս պահին Հայաստանում առկա են բոլոր տեսակի պատվաստանյութերը: Ասեմ, որ շատ Եվրոպական երկրներ պահանջում են խթանիչ դեղաչափի առկայությունը: Խթանիչ դեղաչափը արվում է մեկ անգամ»,- ասաց Ավանեսյանը:
Նախարարը կարևորեց «ԱՐՄԵԴ» համակարգի կիրառումը և շեշտեց, որ նախարարությունը աշխատանքներ է տանում, որպեսզի մեր «ԱՐՄԵԴ» համակարգը ընդլայնվի ու ավելի շատ բժշկական տվյալներ ներառվեն այնտեղ, ինչը կօգնի քաղաքացուն ավելի իրազեկված լինել, թե՞ ինչ հետազոտություններ է անցել:
«Բացի դրանից, Հայաստանում առողջապահության զարգացման համար շատ կարևոր է ունենալ այդ միասնական տվյալների բազան, մենք պետք է հստակ ունենանք հիվանդացությունների և դեպքերի մասով ամբողջական պատկեր»-եզրափակեց Անահիտ Ավանեսյանը:
