Հայաստանից արտահանումը խթանելու և ձեռներեցներին աջակցելու նպատակով Հայ գործարարների ասոցիացիան ՀՀ էկոնոմիկայի նախարարության հետ համատեղ Երևանում անցկացրեց «Բուխտա Յուգ» մանրածախ և մեծածախ բազմապրոֆիլային առևտրի կենտրոնի շնորհանդեսը։ Հետաքրքրված գործարարներին ներկայացվեցԻն կենտրոնի աշխատանքին ներգրավվելու մանրամասներն ու պայմանները:
«Շատ կարևոր է զարգացնել հայկական ենթակառուցվածքները տարբեր երկրներում, քանի որ դրանց միջոցով հայկական ապրանքները շատ ավելի հեշտ են հասնում այդ երկրների սպառողներին: Ողջունում եմ «Բուխտա Յուգի» ստեղծումը, որտեղ հայկական ապրանքները կարող են առանց ռիսկերի վաճառվել ռուսական շուկայում: «Բուխտա Յուգը» հսկայական առևտրային տարածք է, որտեղ հայկական գյուղմթերքը՝ թե մեծածախ, թե մանրածախ, կարող է վաճառվել հարմար պայմաններով»,- իր խոսքում նշեց էկոնոմիկայի նախարար Վահան Քերոբյանը՝ հավելելով, որ իր ղեկավարած կառույցը պատրաստ է անել հնարավորը, որ նոր «Բուխտա Յուգը» լինի պահանջված և աշխատի արդյունավետ: Նա նաև կոչ արեց հայ արտահանողներին ու առևտրականներին աշխատանքի համար նախընտրել այն ենթակառուցվածքը, որն ավելի հարազատ է:
«Հայկական գյուղմթերք արտադրողներն ու արտահանողները մշտապես հանդիպում էին այդ խնդրին, և «Տաշիր» ընկերությունների խմբի նախագահ Սամվել Կարապետյանը որոշում կայացրեց ու հանձնարարականներ տվեց՝ ստեղծել հայ արտադրողի համար բաց ու առաջնային իրավունքներով օժտված տնտեսական առևտրային գոտի: Արդեն այսօր գնվել է Մոսկվայի ամենախոշոր առևտրի կենտրոններից մեկը, որի մասով հետաքրքիր առաջարկներ ենք պատրաստել հայ արտադրողների և արտահանողների համար»,- նշեց «Տաշիր» ընկերությունների խմբի առաջին փոխնախագահ Նարեկ Կարապետյանը՝ կոչ անելով հայ արտահանողներին ակտիվություն ցուցաբերել՝ հետագայում վաճառակետերի բացակայությունից խուսափելու համար:
Միջոցառման ընթացքում «Բուխտա Յուգ» առևտրի կենտրոնների գլխավոր տնօրեն Վիկտոր Գրիգորյանը ներկայացրեց կենտրոնի առավելությունները, արդեն իսկ գրանցած կոմերցիոն հաջողությունները և տարածքի վարձակալության պայմանները:
«Այսօր արդեն երկու «Բուխտա» կենտրոն է գործում Մոսկվայում: Նախագծի հիմնական կոնցեպտը պարենային ապրանքների մեծածախ և մանրածախ, ինչպես նաև շինարարական ապրանքների ու կահույքի վաճառքն է: Այս պահին յուրաքանչյուր կենտրոնում ներկայացված է ավելի քան 100,000 անուն ապրանքատեսակ»,- նշեց Գրիգորյանը:
Նրա խոսքով՝ ռուսական շուկայում արդեն իսկ գոյություն ունեցող ընկերությունների համար «Բուխտա Յուգը» իրենց բիզնեսը զարգացնելու և ընդլայնելու լավ հնարավորություն է, իսկ նրանց համար, ովքեր նոր են պատրաստվում մուտք գործել այդ շուկա, այս նախագիծը բիզնեսի վարման բացառիկ պայմաններ ու հնարավորություններ է առաջարկում: Առևտրի կենտրոնի տարածքում մի մեծ հատված է առանձնացված, որտեղ մատակարարները հնարավորություն են ունենալու վաճառել իրենց ապրանքը հենց բեռնատարներից՝ միաժամանակ այդտեղ կարող է տեղակայվել ավելի քան 120 բեռնատար: Տարածքը նաև ապահովվելու է անվտանգության բարձրորակ համակարգերով:
Հայ գործարարների ասոցիացիայի գործադիր տնօրեն Գոհար Ղումաշյանն էլ տեղեկացրեց, որ ՀՀ էկոնոմիկայի նախարարության հետ համատեղ արդեն իսկ հայտադիմումներ են ընդունում արտադրողներից, թե ինչ ձևաչափով և ինչ ոլորտներ են նրանք ներկայացնելու «Բուխտա Յուգ» առևտրի կենտրոնում:
«Մեզ համար շատ կարևոր է, որ հայ արտադրողները հնարավորություն ունենան անխոչընդոտ դուրս գալու ռուսական շուկա: Դա Հայ գործարարների ասոցիացիայի գլխավոր նպատակներից է՝ ավելի կայուն կամուրջ ստեղծելու գործարարների միջև, որոնք ապրում են ոչ միայն ՀՀ-ում, այլև ՌԴ-ում: Եվ շատ ենք կարևորում նաև, որ ամենատարբեր ոլորտներից այս նախագծի նկատմամբ մեծ հետաքրքրություն կա»,- նշեց նա:
Նախագծի շնորհանդեսին մասնակցել են նաև այն ընկերությունների ներկայացուցիչները, որոնք ներկայացված են կամ ցանկանում են ներկայանալ ռուսական շուկայում՝ հնարավորություն ունենալով տեղում տարածքի վարձակալման ամրագրումներ անելու և ստանալու իրենց հետաքրքրող հարցերի պատասխանները:
«Բուխտա Յուգ» մեծածախ և մանրածախ առևտրի կենտրոնը թվով երրորդ նմանատիպ կենտրոնն է Մոսկվայում։ Ավելի քան 270,000 քմ զբաղեցնող կենտրոնի տարածքում, որը սպառողների համար իր դռները նախատեսում է բացել 2022-ի սեպտեմբերին, կտեղակայվի ավելի քան 2000 խանութ ու տաղավար։ Անմիջապես մատակարարներից ներկայացվելու են ամենատարբեր ապրանքները՝ գործվածքներ, հագուստ, շինանյութ ու սննդամթերք:
