ՀՀ ԱԳ նախարարի մամուլի խոսնակ Վահան Հունանյանը տեղեկացրել է, որ փետրվարի 14-ին տեղի է ունեցել ՀՀ ԱԺ նախագահի տեղակալ, Հայաստան-Թուրքիա կարգավորման գործընթացում հատուկ ներկայացուցիչ Ռուբեն Ռուբինյանի և ՌԴ ԱԳ նախարարի տեղակալ Անդրեյ Ռուդենկոյի հեռախոսազրույցը:
Զրուցակիցները մտքեր են փոխանակել Հայաստանի և Թուրքիայի միջև հարաբերությունների կարգավորման գործընթացի վերաբերյալ: Երկուստեք հույս է հայտնվել, որ հատուկ ներկայացուցիչների՝ Վիեննայում կայանալիք երկրորդ հանդիպումն արդյունավետ կլինի։
Թուրքագետ Հակոբ Չաքրյանը գտնում է, որ թեպետ ֆորմալ առումով Ռուսաստանը հայ-թուրքական բանակցություններում որևէ դերակատարություն չունի, այդուհանդերձ պրոցեսից դուրս մնալ չի ցանկանում։ Եվ դա է վկայում այն հանգամանքը, որ թուրք բանագնացի հետ առաջին հանդիպումից առաջ և հետո Ռուբինյանը Ռուդենկոյի հետ թեմայի շրջանակներում զրույց է ունենում․«Ուկրաինացի բլոգգերները վերջին շրջանում նյութեր էին տարածում այն մասին, որ Հայաստանն անցել է ռուսական կառավարման, այսինքն՝ Ռուսաստանը Հայաստանի իշխանություններին վերահսկում է, իշխանություններն էլ նրանց ցանկությամբ են գործում։ Փաստորեն Ռուսաստանը չի ցանկանում հայ-թուրքական կարգավորման գործընթացից դուրս մնալ։ Ոչ միայն դուրս մնալ չի ուզում, այլ սեփական ջանքերով կարգավորել դրանք՝ հայկական կողմի միջոցով»,-«Առաջին լրատվական»-ի հետ զրույցում ասաց նա։
Հակոբ Չաքրյանն այդ միտումը վտանգավոր է համարում․«Կրկին մեջբերեմ Պուտինի խորհրդականի հարցազրույցն այն մասին, որ հայ-թուրքական համագործակցությունը հրաշալի մակարդակի վրա է գտնվում և այն առավել արդյունավետ դրսևորվել է 44 օրյա պատերազմի ընթացքում։ Մինչ այդ նույն Դուգինը ռուսական հեռուստատեսության էկրանից հայտարարել էր, որ Իլհամ Ալիևը թող չոգևորվի, նրա հաղթանակը Ռուսաստանն է ապահովել, ոչ թե Թուրքիան։ Ասում էր՝ եթե Ռուսաստանը չլիներ, Ադրբեջանը չէր կարողանա հաղթանակ գրանցել։ Ուզում եմ ասել, որ այդպիսի դաշնակից մեզ պետք չէ։ 1997 թվականին մենք բարեկամության, համագործակցության ու փոխօգնության պայմանագիր ենք ստորագրել, բայց ընդդեմ հայ ժողովրդի ու Արցախի սանձազերծած պատերազմի ժամանակ Ռուսաստանը աջակցեց ոչ թե մեզ, այլ Թուրքիային ու Ադրբեջանին։ Փաստորեն օգնեց, որ նաև ներգրավվի ահաբեկիչ վարձկաններին։ Էրդողանը հայտարարեց, որ այդ պատերազմին մասնակցել է, որպեսզի ավարտին ահսցնի 1915 թվականին երիտթուրքերի կիսատ թողածը, դրանից հետո Պուտինն Էրդողանին հռչակեց իր լավագույն ընկերը։ Եթե դա հանցագործություն չէ, ուրիշ ինչպե՞ս որակենք, ինչու՞ ենք շարունակում ապավինել Ռուսաստանին։ Պուտինը պատերազմի հանցագործ է, միթե՞ այդ գիտակցությունը չկա Հայաստանում»։
Մեր զրուցակիցը նաև համարում է, որ մենք մեր քայլերի մասին Ռուսաստանին տեղյակ ենք պահում, քանի որ չունենք ինքնիշխանություն ու անկախություն․ «Ռուսաստանը մեր դաշնակիցը չէ, մենք ենք Ռուսաստանի դաշնակիցը՝ այն էլ գաղութի կարգավիճակով։ Իսկ Հայաստանում Ռուսաստանի դեսպանը գեներալ-գուբերնատոր է, նա է ամեն ինչ տնօրինում։ Առաջին հանդիպումից առաջ էլ Ռուդենկոն ընդունեց Ռուբինյանին, հիմա էլ Վիեննայի հանդիպումից առաջ նորից հեռախոսազրույց է ունենում։ Ես սա խիստ մտահոգիչ եմ համարում։ Հավանաբար ռուս-թուրքական հերթական քաղաքական սակարկություններն են՝ նորից ի վնաս հայ ժողովրդի։ Առ այսօր մեր տարածքային ամբողջականությունը խախտված է, բայց մենք չենք կարողանում այն վերականգնել՝ նորից Ռուսաստանի պատճառով։ Առ այսօր չենք կարողանում նաև ճշտել՝ կորածների թիվը որքան է։ Հավանաբար անհետ կորածները սպանված են, արդյոք չգիտեն այդ մասին։ Որպեսզի Հայաստանում հակառուսական տրամադրությունները չսրվեն, իրական թիվ չեն հրապարակում։ Այդ մասին գիտի Էրդողանը, Ալիևը, Կրեմլում բոլոր տականքները գիտեն, իսկ հայ ժողովուրդը չգիտի։ Հիմա ասում են՝ մի վիճարկեք թիվը, բայց ո՞նց չվիճարկենք, իրական թիվն ենք ուզում իմանալ, իրավունք չունե՞նք ՝ որպես ՀՀ քաղաքացի»-եզրափակեց նա։
Քաղաքագետ Ռոբերտ Ղևոնդյանն էլ «Առաջին լրատվական»-ի հետ զրույցում նշեց՝ պետք է նկատի ունենալ, որ առաջին հանդիպումը Մոսկվայում տեղի ունեցավ, նաև պետք է հասկանանք, որ անկախ նրանից, Ռուսաստանը հայ-թուրքական հարաբերությունների կարգավորման գործընթացում պաշտոնական միջնորդ է, թե ոչ, շարունակում է ձեռքը պահել գործընթացի վրա․ «Այդ մասին հայտարարում են ռուս տարբեր պաշտոնյաներ՝ ընդգծելով, որ իրենք այդ գործընթացի մասնակիցն են։ Տեղի ունեցած հեռախոսազրույցն էլ այդ տրամաբանությամբ է։ Բացի այդ՝ ուկրաինական ճգնաժամի ֆոնին Ռուսաստանի մտահոգությունները կարելի է հասկանալ։ Այս պահին ռուս-արևմտյան հարաբերություններ սրված են, հանդիպումն էլ Վիեննայում է տեղի ունենալու, բնականաբար Մոկսվայում կան որոշակի մտահոգություններ»,-ընդգծեց մեր զրուցակիցը։
