Փետրվարի 14-ից Թուրքմենստանում մեկնարկել Է նախագահական ընտրարշավը եւ դրա առաջին փուլը՝ թեկնածուների առաջադրումը: Այդ մասին հաղորդել Է ՌԻԱ Նովոստի գործակալությունը:
Թուրքմենստանի ընտրական օրենսգրքին համապատասխան, թեկնածուների առաջադրման իրավունքը պատկանում Է քաղաքական կուսակցություններին, որոնք գրանցվել են մինչեւ ընտրությունների նշանակման օրը, ինչպես նաեւ քաղաքացիների խմբերին: Քաղաքական կուսակցությունները նախագահի թեկնածուներին առաջադրում են իրենց համագումարներում:
Թուրքմենստանում գործում են երեք քաղաքական կուսակցություններ՝ Թուրքմենստանի դեմոկրատական կուսակցությունը, Թուրքմենստանի ագրարային կուսակցությունը եւ Թուրքմենստանի արդյունաբերողների ու ձեռնարկատերերի կուսակցությունը:
Քաղաքացիների խմբերի կողմից Թուրքմենստանի նախագահի թեկնածու առաջադրելիս նա պետք Է աջակցություն ստացած լինի ընտրողների առնվազն 10 հազար ստորագրություններով: Թուրքմենստանի նախագահ կարող Է ընտրվել երկրի այն քաղաքացին, որը ծնվել Է Թուրքմենստանում, քառասուն տարին լրացած լինի, տիրապետի պետական լեզվին, նախորդ տասնհինգ տարիներին մշտապես ապրած եւ աշխատած լինի երկրում:
Թուրքմենստանի նախագահն ընտրվում Է անմիջապես երկրի ժողովրդի կողմից՝ յոթ տարի ժամկետով եւ պաշտոնն ստանձնում Է երդմնակալության պահից: Վերջին անգամ Թուրքմենստանի նախագահի ընտրություններն անցկացվել են 2017 թվականին: Այն ժամանակ երկրի բարձրագույն պետական պաշտոնին հավակնում Էին ութ թեկնածուներ:
