Հայաստան-Իրանի հարաբերությունները միշտ որակվել են բարիդրացիական և բարձր մակարդակի, բայց գործնական, տնտեսական ոլորտում, որը ցույց է տալիս, թե երկու երկրների միջև հարաբերությունները որքանով են աշխույժ, որքանով են դիմանիկ և ինչպես են զարգանում, հարբերությունների մակարդակը բավարար չէ: Այս մասին «Առաջին լրատվական»-ի հետ զրույցում նշեց Իրանի Մեջլիսի հայ պատգամավոր Ռոբերտ Բեգլարյանը:
«Իհարկե, ենթակառուցվածքների, մասնավորապես, էներգետիկ բնագավառում, ելնելով երկու երկրների հնարավորություններից ու պահանջներից, ավելի զարգացման ականատես ենք եղել, բայց ենթադրենք, երբ խոսվում է առևտրատնտեսական հարաբերությունների մասին, որն անմիջապես կապված է ճանապարհների ու նման ենթակառուցվածքների հետ, նույն համագործակցությունը չի նկատվում: Դա, անշուշտ, կարիք ունի ախտաճանաչման, որը չի էլ կատարվել: Դա պետք է երկու երկրների կողմից կատարվի»,-ասաց նա:
Բեգլարյանի խոսքով, երկու երկրների գիտնականները, լրագրողները, մտավոր կենտրոնները պետք է սա լրջորեն ուսումնասիրեն, որովհետև տարածաշրջանի փոփոխությունները պարտադրում են ավելի լուրջ մոտենալ խնդրին, իսկ առանց ախտաճանաչման դա հնարավոր չէ:
«Բայց նկատի ունենալով Իրանի՝ քաղաքական որոշում կայացնելու բազմաշերտ ու բազմաոլորտ համակարգը, ինձ թվում է՝ պետք է հատուկ ակտիվություն լինի նաև Հայաստանի կողմից, թե Իրանի որոշում կայացնելու, թե ընդհանուր քաղաքական ներքին դինամիզմը լուրջ քննարկվի, որ այդ ուղղությամբ հարաբերությունները օգտակար լինեն և նոր փուլ թեևակոխեն»,-ընդգծեց նա:
