«Շիրակի ձմեռ-2022» ամենամյա փառատոնն այս տարի կանցկացվի փետրվարի 26-ին Մեծ Սարիար գյուղում:
Լինելու են սպորտային, ժամանցային, մշակութային ու ցուցադրական ելույթներ: Նախաձեռնողը ՄԱԿ-ի Զարգացման Ծրագրի Շիրակի տուրիզմի զարգացման եւ հետազոտության կենտրոնն է՝ Շիրակի մարզպետարանի հետ համատեղ:
Միջոցառմանը ամենահամեղ ուտեստներով ներկա կլինեն Շիրակի մարզում գործող արեւելյան, իտալական, ավստրիական և հայկական խոհանոցները: Միջոցառման նպատակն է զարգացնել ձմեռային տուրիզմը Շիրակի մարզում՝ ապահովելով ակտիվ հանգիստ և հետաքրքիր ժամանց:
Շիրակի տուրիզմի զարգացման եւ հետազոտության կենտրոնի համակարգող Նաիրա Գրիգորյանը հրավիրված ասուլիսի ժամանակ, ներկայացնելով սպասվող միջոցառումը, տեղեկացրեց, որ միջոցառմանը հրավիրված են ինչպես մարզի համայնքներից, այնպես էլ հարևան մարզերից ու Երևանից: Միջոցառման ծավալներն ու մասնակիցների թիվն այս անգամ, ըստ պատասխանատուի, կրկնապատկվել է:
«Լինելու են և՛ սիրողական, և՛ մրցութային ելույթներ: Հաղթող մասնակիցների համար պատրաստված են նաև նվերներ: Կլինեն նաև ավանդական պարի խմբեր, հյուրասիրություն: Միջոցառման մարզական մասը բաղկացած է մրցութային, սիրողական խաղերից, ցուցադրական ելույթներից: Խաղերի հաղթողները կստանան գավաթներ, պատվոգրեր, կլինեն հանգստի գոտիներ: Կլինեն մեքենաներ, որոնք Գյումրիից ցանկացողներին կտեղափոխեն միջոցառման համար նախատեսված տարածք»,-նշեց պատասխանատուն՝ տեղեկացնելով, որ այս տարի մասնակիցներին սպասվում են հաճելի անակնկալներ՝ պարապլան, դահուկավազք, սնոուբորդ, լեռնադահուկ, սնոուքայթինգ, քայթբորդինգ, հեծանվավազք, ռաֆթինգ փեյնթբոլ, ջիփփինգ, արագընթացներ (բուռաններ) և այլն:
Նախաձեռնության պատասխանատուները նաև նշեցին, որ նպատակ ունեն տուրիզմը համայնքներում զարգացնելու նպատակով միջոցառումներն իրականացնել տարբեր համայնքներում:
