Այսօր ՖԻՖԱ-ն հրապարակած դասկարգման աղյուսակում Հայաստանի ազգային հավաքականը պահպանելով դիրքը շանունակում է մնալ 92-րդ հորիզոնականում։ Արձանագրենք, որ 2022 թվականը Խոակին Կապառոսի թիմը 99-րդ կետից։ Մոտ մեկ ամսից մեր հավաքականն այս տարվա առաջին հանդիպումը կանցկացնի։ Մարտի 24-ին մեր գլխավոր թիմը Երևանում ստուգողական հանդիպում կանցկացնի Չեռնոգորիայի հետ, իսկ 5 օր անց կհյուրընկալվի Նորվեգիային։ 2021 թվականին Հայաստանի ազգային հավաքականն անցկացրեց 10 պաշտոնական և 2 ընկերական հանդիպում։ Աշխարհի առաջնության ընտրական փուլում մերոնք տարան 3 հաղթանակ 3 հանդիպում ավարտեցին ոչ-ոքի և կրեցին 4 պարտություն։ Ստուգողական հանդիպումներում Հայաստանը ոչ-ոքի 1։1 խաղաց աշխարհի փոխչեմպիոն Խորվաթիայի և 1։3 հաշվով զիջեց Շվեդիային։ Գնանք ավելի հետ․ 2020 թվականին տեղի ունեցած Ազգերի լիգայի մրցաշարում Հայաստանի ազգային թիմը հաղթող դառնալով C դիվիզիոնի երկրորդ ենթախմբում, նվաճել էր B դիվիզիոնի ուղեգիր։ Ազգերի լիգայի կտրվածքով՝ Հայաստանը բավական լավ դիրքում է և շրջանցել է այնպիսի հավաքականների, ինչպիսիք են Թուրքիան, Բուլղարիան, Սլովակիան, Հյուսիսային Իռլանդիան։ Այս հավաքականները Ազգերի լիգայի 2022 թվականին կայանալիք խաղարկությունում ելույթ կունենան ավելի ցածր՝ C դիվիզիոնում։
Այո Ազգերի լիգայի կտրվածքով մեզ հաջողվել է շրջանցել Թուրքիային, բայց․․․։ Վարկանիշային աղյուսակում պատկերը միանգամայն այլ է։ Նշենք, որ Ազգերի լիգայում Խոակին Կապառոսի թիմին միայն Վրաստանի և Հյուսիսային Մակեդոնիայի նկատմամբ տարած հաղթանակներից հետո հաջողվել էր հայտնվել աղյուսակի լավագույն հարյուրյակում։ Տևական ժամանակ մենք տեղ չունեինք աշխարհի լավագույն 100 ազգային թիմերի շարքում։ 2020 թվականի հոկտեմբերին ՖԻՖԱ-ի հրապարակած վարկանիշային աղյուսակում Հայաստանի հավաքականը 101-րդն էր։ Որպեսզի սթափ գնահատական տանք ՖԻՖԱ-ի դասակարգման ցուցակին, հիշենք, թե ինչ վիճակում էր մեր հավաքականը մինչև Խոակին Կապառոսը։ Հայաստանի գլխավոր թիմը ընտրական նախավերջին մրցաշարի վերջին խաղում 9։1 հաշվով պարտվել էր Իտալիային։ Ընդունենք, որ նման հաշվով պարտված հավաքականն օբյեկտիվորեն ուղղակի չէր կարող տեղ ունենալ լավագույն հարյուրյակում։ Ուստի, 2020 թվականի մեր դիրքը ՖԻՖԱ-ի աղյուսակում արտացոլում էր միանգամայն իրական պատկեր։ Մինչև Իտալիայի հետ հայտնի հանդիպումը երկրպագուների հիմնական մասը վստահ էր, որ մեր հավաքականը կջախջախի դասակարգման աղյուսակում մեզնից ավելի բարձր հորիզոնականներում գտնվող հավաքականներին: Հիմա արդեն նման համոզմունք ունեցող մարդկանց թիվը այնքան էլ մեծ չէ: 2022 թվականի աշխարհի առաջնության ընտրական փուլում Հայաստանի հավաքականը Երևանում ոչ-ոքի խաղաց դասարագրման աղյուսակի վերջնամասում գտնվող Լիխտենշտեյնի հետ։ Հետևաբար Հայաստանի հավաքականի ներկայիս դիրքը աղյուսակում նույնպես պետք է համարել օբյեկտիվ։ Ավելին, դասակարգման աղյուսակը կարելի է համարել չափորոշիչ գլխավոր մարզչի և ընդհանրապես ազգային թիմի կատարած աշխատանքի վերաբերյալ։ Կապառոսի գլխավորությամբ Հայաստանի հավաքականը վերադարձավ լավագույն հարյուրյակ։ 2021 թվականը սկսեցինք 99-րդ հորիզոնականից։ Այս պահին մեր ընտրանին 92-րդ է։ Այսինքն մեկ տարում իսպանացի մասնագետին հաջողվեց Հայաստանին հավաքականի բարձրացնել 7 կետով։
Ընդհանուր առմամբ գրանցված ցուցանիշը կարելի է համարել բավարար հաշվի առնելով մի շարք օբյեկտիվ և սուբյեկտիվ գործոններ։Այո, մի պահ թվում էր թե մեր ազգային թիմը կարող է հայտնվել աշխարհի առաջնության ընտրական փուլում։ Մի տպավորիչ հանդիպումները սակայն բավարար չեն մեծ հաջողության հասնելու համար։ Փաստենք միայն, որ Կապառոսին հաջողվել է մեր հավաքականին դնել այսպես ասած ռելսերի վրա, որը հնարավորություն է տալիս թեկուզ դանդաղ, բայց առաջ շարժվել։ Առջևում Ազգերի լիգայի 2022 թվականի խաղարկությունն է որտեղ մեր հավաքականը կանցկացնի 6 հանդիպում։ Արձանագրենք, որ Կապառոսի համար աշխատանքային հաջորդ փուլը սկսվում է 92-րդ կետից։ Հիշեցնենք, որ Ազգերի լիգայի խաղարկությունում B դիվիզիոնի առաջին ենթախմբում Հայաստանի հավաքականին բաժին են հասել Ուկրաինայի, Իռլանդիայի և Շոտլանդիայի հավաքականները։
B դիվիզիոնում տեղը պահպանելը մեր հավաքականի համար կլինի բավարար արդյունք։ Առաջիկա մրցաշարը այո հնարավորություն է պայքարելու 2024 թվականի Եվրոպայի առաջնության եզրափակիչ փուլի ողեգրի համար, բայց․․․։ Ընդունենք, որ Եվրոյում ընտրական մրցաշարի միջոցով հայտնվելը մեզ համար շատ ավելի իրատեսական է։