Ֆուտբոլի Հայաստանի ազգային հավաքականի կիսապաշտան Վահան Բիչախչյանը շարունակում է փայլել իր նոր թիմի լեհական «Պոգոնի» կազմում։ Երեկ «Պոգոնը» ստուգողական խաղում 7։2 հաշվով առավելության հասավ «Օլիմպիա Էլբլոնգի» նկատմամբ։ Մեր ֆուտբոլիստը դուբլ ձևակերպեց աչքի ընկնելով 41-րդ և 48-րդ րոպեներին։ Նշենք, որ Բիչախչյանը 5-րդ խաղում անընդմեջ դարձավ գոլի հեղինակ։ Նորամուտի 5 խաղերում խփած 6 գնդակը կարելի է համարել ֆանտաստիկ ցուցանիշ 22-ամյա կիսապաշտպանի համար։ Բիչախչյանը «Պոգոնի» կազմում գոլերի հաշիվը բացել էր շվեյցարական «Ցյուրխի» դեմ նորամուտի խաղում։ Այնուհետև աչքի էր ընկել ուկրաինական «Զարիայի» և գերմանական «Հանզայի» դեմ հանդիպումներում։ Եվ վերջապես նորամուտը նշելով արդեն Լեհաստանի բարձրագույն լիգայում Բիչախչյանը «Պյաստ Գիլիվցեի» դեմ սկզբունքային մրցավեճում դուրս գալով փոխարինման 6 րոպե անց հաշիվը դարձրել էր 2։0։ «Վահանը դեռ նախապատրաստական փուլում ցույց էր տվել, թե որքան վտանգավոր է մրցակցի դարպասի մոտ։ Նա գոլ խփեց իր նորամուտի խաղում և ուրախացրեց ինչպես ինձ, այնպես էլ ամբողջ թիմին։ Կարծում եմ, որ մենք արժանի էինք այս հաղթանակին»,- «Պյաստ Գիլիվցեի» դեմ խաղից հետո ասել էր «Պոգոնի» գլխավոր մարզիչ Կոստա Ռունյայիչը։ Այս հաղթանակի շնորհիվ Լեհաստանի ընթացիկ առաջնությունում «Պոգոնը» ամրապնդել էր դիրքերը երկրորդ հորիզոնականում։
Մասնավորապես, 20-րդ տուրից հետո «Պոգոնն» ունի 40 միավոր և ընդամենը երկու միավորով է զիջում Պոզնանի «Լեխին»։ Բիչախչյանի թիմը գնում է դեպի չեմպիոնություն և ունի բոլոր հնարավորությունները մեծ հաղթանակին հասնելու։ Արդեն իսկ կարող ենք արձանագրել, որ Բիչախչյանի գալուստով չեմպիոնության համար պայքարում «Պոգոնի» հավակնությունները մեծացել են։ «Առաջին օրվանից սկսած Վահանը շատ լավ մերվեց կոլեկտիվին: Երիտասարդ մեծ պոտենցիալով խաղացող է ու զարգանալու տեղ ունի: Նա իր թիմի հիմնական կազմի խաղացող էր, շատ հանդիպումներ է անցկացրել ու քիչ գոլեր չի խփել: Բիչախչյանը բազմակողմանի զարգացած ֆուտբոլիստ է: Նա անպայման կնստի ավտոբուս ու կմեկնի թիմի հետ առաջիկա խաղին: Խոսքը մի ֆուտբոլիստի մասին է, որն անպայման օգուտ է տալու մեզ»,- նշել էր «Պոգոնի» գլխավոր մարզիչը դեռևս «Պյաստ Գիլիվցեի» դեմ խաղից առաջ։ Հիշեցնենք, որ հունվարի 10-ին մեր ֆուտբոլիստը 3․5 տարվա պայմանագիր էր կնքել «Պոգոնի» հետ: Բիչախչյանը 2017 թվականից հանդես էր գալիս Սլովակիայի «Ժիլինայում»: The Guardian-ի վարկածով 2016 թվականին հայ կիսապաշտպանը դասվում էր աշխարհի ամենատաղանդավոր 60 պատանի ֆուտբոլիստների շարքում։
Հայաստանի ֆուտբոլի ազգային թիմի կազմում Բիչախչյանը նորամուտը նշել էր 2020 թվականին: Մինչ այդ նա տպավորիչ ու արդյունավետ ելույթներով աչքի էր ընկնում Հայաստանի երիտասարդական և պատանեկան հավաքականներում։ Բիչախչյանի տեղափոխությունը «Պոգոն» կարելի է համարել նրա կարիերայում էական առաջընթաց։ Ըստ Transfermarkt պարբերականի նախորդ տարվա դեկտեմբերին Բիչախչյանի տրանսֆերային արժեքը ավելանալով 300 հազար եվրոյով, դարձել է 900 հազար եվրո։ Նույն պարբերականի համաձայն, «Պոգոնը» հայ ֆուտբոլիստի տրանսֆերի համար վճարել է հենց այդքան գումար։ Բիչախչյանը դարձել էր «Պոգոնի» պատմության ամենաթանկ ձեռքբերումը։Ի դեպ՝ Բիչախչյանը «Ժիլինայի» ամենաթանկ ֆուտբոլիստն էր Նախորդ տարվա մայիսին, գրավելով Շվեդիայի ազգային թիմի դարպասը, Բիչախչյանն իր առաջին գոլն էր խփել Հայաստանի հավաքականի կազմում։
Լիահույս ենք, որ Ազգերի լիգայի առաջիկա խաղարկությունում, ինչպես նաև Եվրոպայի առաջնության ընտրական փուլում Բիչախչյաը արդյունավետ խաղով աչքի կընկնի մեր գլխավոր թիմում։ «Պոգոնում» հայտնվելը և ֆանտաստիկ նորամուտը էական առաջընթաց էր ֆուտբոլիստի կարիերայում որը պետք է դրսևորվի նաև Հայաստանի ազգային թիմում։
