Բելառուսի նախագահ Ալեքսանդր Լուկաշենկոն YouTube ալիքով պատասխանելով ռուսաստանցի լրագրող Վլադիմրի Սոլովյովի հարցերին և անմասն չի մնացել նաև Հայաստանին անդրադառնալուց։
Լուկաշենկոյի կարծիքով՝ առաջիկա 15 տարիներին Մոսկվայի ու Մինսկի նախաձեռնած միութենական պետության կազմում կընդգրկվի նախկին ԽՍՀՄ հանրապետությունների մեծ մասը՝ Ուկրաինան, Հայաստանը, Ղազախստանը և կենտրոնասիական այլ պետություններ․«Բելառուսն արդեն այնտեղ է։ Կարծում եմ, Ղազախստանի համար լավ դաս էր։ Եթե ասում եք ժամկետը 15 տարի է, վստահ եմ, որ Ուկրաինան այնտեղ կլինի, եթե սխալներ թույլ չտանք։ Դե, իսկ մնացածը՝ ըստ պարագծի… այդ հզորության միավորման ավարտից հետո, կամ միավորման ընթացքում… իրենք որտե՞ղ են հայտնվելու։
Հայաստանը փախչելու տեղ չունի… ինչ է, կարծում եք, նրանք ինչ-որ մեկին պե՞տք են… իրենք արդեն տեսել են, Նիկոլ Վովաևիչը դա արդեն տեսել է։ Ադրբեջանը դուրս է մնում այդ կոհորտայից, որովհետև մենք նույնպես շատ սխալներ ենք թույլ տվել։ Առանձին խոսակցություն է, և այնտեղ, իհարկե, Թուրքիան շատ լուրջ կերպով սատարում է Ադրբեջանին. Թուրքիայի միջոցով են հոսում [ադրբեջանական] գազը, նավթը… Իսկ Թուրքմենստանը, Ուզբեկստանը և Տաջիկստանը, կարծում եմ, տնտեսական նպատակահարմարությունից ելնելով, նույնպես կմիանան», -ընդգծել է Բելառուսի նախագահը։
ԳԽ պատգամավոր Ազատ Արշակյանը՝ նախևառաջ պետք է հասկանալ, թե ինչ է ասել Բելառուսի նախագահը․ «Նա փաստացիորեն ասել է՝ Հայաստանը որևէ մեկին պետք չէ։ Դա կարելի է նաև այսպես ասել՝ Հայաստանը անպետք պետություն է, որևէ մեկին պետք չէ։ Ամբողջ աշխարհը իր պատժամիջոցներով համերաշխորեն հայտարարում է, որ այդ ակումբը անպետք պետությունների ակումբ է։ Եթե մենք չենք հասկացել, 44 օրյա պատերազմի հետևանքներին ծանոթ չենք, չենք տեսնում, թե ինչ տնտեսական համակարգում ենք գտնվում, այնտեղ պետության ղեկավարները տասնամյակներով չեն փոխվում և եթե մենք դրա վտանգները չենք գիտակցում՝ շատ վատ է։ Մեզ մոտ իրոք ինչ-որ բան անպետք է, իսկապես ինչ-որ անպետք մի բան կա, որ պետք է փոխվի։ Դա մեր վերաբերմունքն ու ինքնագնահատականն է։ Մեզ այնտեղից ասում են՝ դուք անպետք եք, մենք պատասխանում ենք՝ դուք էլ եք անպետք։ Ես կարծում եմ՝ այդպես չի կարելի»,-«Առաջին լրատվական»-ի հետ զրույցում ասաց նա։
Ըստ Արշակյանի՝ մենք պետք է խզենք մեր կապերն անպետքների հետ․ «Ու հարաբերություններ ստեղծենք պետքական, օգտակար քաղաքական միությունների հետ։ Պետք է դաշնակիցներ փնտրենք օգտակար պետությունների մեջ։Մտել ենք անպետքների մեջ ու ասում է՝ դու՞ք եք ավելի շատ անպետք, թե՞ մենք։ Կարծում եմ՝ այստեղ կարևոր չէ՝ ընդդիմություն է, թե իշխանություն։ Հայկական պետության իշխանությունը երկու թև ունի՝ քաղաքական մեծամասնություն ու փոքրամասնություն։ Նրանց հայտարարությունը իրենց պետքական լինելու մասին չի հնչել։ Դա ռուսերենում կոչվում է՝ «աբառոտկա», «Դուռակ, սամ դուռակ» շրջապտույտից պետք է դուրս գալ ու լինել առաջընթաց ապրող, ժողովրդավարական ազատ պետություն ու ունենալ ընկերներ։ Ասա ընկերդ ով է, ասեմ՝ դու ով ես։ Եթե քո ընկերն անպետք է, ուրեմն՝ դու էլ ես անպետք»,-եզրափակեց նա։
Քաղաքագետ Լևոն Շիրինյանի դիտարկմամբ՝ նախևառաջ Լուկաշենկոյին պետք է պատասխանի Հայաստանի ԱԳՆ-ն․<<Կամ դեսպանին կանչի ու հետը լրջորեն խոսի, նաև խոսի ՀԱՊԿ շրջանակներում բարոյականության չափորոշիչների մասին։ Հայաստանը ՀԱՊԿ-ի դիտում է որպես բարոյական քաղաքական կառույց և ոչ գազանանոց։ Ենթադրում եմ, որ բոլոր դեպքերում Պուտինը սրա հետ խառը չէ։ Բայց նա էլ լավագույնս առիթն օգտագործում է Պուտինին քծնելու համար։ Ալիևն էլ նավթ ուղարկելու մեսիջ է ուղարկում»,-«Առաջին լրատվական»-ի հետ զրույցում ասաց նա։
Մեր զրուցակցի դիտարկմամբ՝ կա նաև Բելառուսում հայ համայնքի մեղքը․ «Եթե կազմակերպված համայնք ունենայինք, վաղուց Բելառուսում մենագրություններ, հոդվածներ կգրվեին՝ առ այն, որ Բելառուսի Սոցիալիստական Հանրապետության գործադիր կոմիտեի հիմնադիր նախագահը Ալեքսանդր Մյասնիկյանն է, Բելառուսի կոմունիստական կուսակցության քարտուղարն էլ է նա եղել։ Հարց՝ այնտեղ ապրող հայերը դա գիտե՞ն, հիմա նման լուրերով պետք է ողողված լիներ համացանցը, ինչու՞ չեն անում»։
Շիրինյանի խոսքերով՝ քաղաքականության մեջ քծնանքը միայն վնաս է տալիս․«Հայաստանը ՀԱՊԿ-ում գործ չունի, իսկ ԵԱՏՄ-ում միայն դիտորդի կարգավիճակ պետք է ունենա։ Այս խնդիրը մնում է ակտուալ»,-եզրափակեց նա։