«Առաջին լրատվական»-ի զրուցակիցն է ՀՀ նախկին արտգործնախարար Արման Մելիքյանը:
–Պարոն Մելիքյան, Թուրքիայի խորհրդարանը վավերացրել է Ադրբեջանի հետ ռազմական համագործակցության մասին Շուշիի հռչակագիրը։Ավելի վաղ դա արել էր Միլի Մեջլիսը։ Հայ-թուրքական հարաբերությունների կարգավորման գործընթացի ֆոնին այս վավերացումներն ի՞նչ նշանակություն են ստանում, ինչպե՞ս կարող են ազդել գործընթացի վրա:
-Տեղի է ունենում Թուրքիայի կողմից Ադրբեջանը կլանելու գործընթաց և Շուշիի հռչակագրի երկուստեք վավերացումը դրա բաղադրատարրերից մեկն է: Թուրքիայի համար այս համատեքստում կարևոր է ցույց տալ, որ Ադրբեջանի շահեր առնձին գոյություն չունեն՝ դրանք իր՝ Թուրքիայի շահերն են և այդ շահերը պետք է քննարկվեն հենց Թուրքիայի հետ: Ընդ որում, սա Անկարայի հրամայական նախապայմանն է, որը հասցեագրված է ոչ միայն Հայաստանին, այլ նախևառաջ Ռուսաստանին, ապա Իրանին: Հայ-թուրքական հարաբերությունների համատեքստում այս վավերացումները հուշում են, որ պաշտոնական Երևանը նաև Արցախի հարցով է ստիպված լինելու խոսել Թուրքիայի հետ:
-Ինչքանո՞վ կարող է սա լինել պատասխան օկուպացված տարածքների մասին Արցախի խորհրդարանի օրենսդրական նախաձեռնությանը:
-Չեմ կարծում, որ եթե Արցախի խորհրդարանը օկուպացված տարածքներին վերաբերվող օրենքի նախագիծը շրջնառության մեջ չդներ, ապա Անկարան ու Բաքուն «կմոռանային» վավերացնել Շուշիի հռչակագիրը: Իր գործողություններում Թուրքիան առաջնորդվում է շատ որոշակի նպատակներ հետապնդող լայն ընդգրկում ունեցող երկարաժամկետ ծրագրով, որը քայլերի հստակ հաջորդականություն է նախատեսում և ունի որոշ միջազգային խոշոր դերակատարների աջակցությունը:
-Հայկական կողմի արձագանքն այդ հռչակագրի վավերացմանն ինչպիսի՞ն պետք է լինի։ Արդյոք կա արձագանքի կարիք առհասարակ։
-Երևանն ու Ստեփանակերտը ոչ միայն միասնական, այլև գոնե ամեն մեկն իր համար գործողությունների հոդաբաշխ ծրագիր չունեն և այս առումով նրանց արձագանքը, կամ էլ արձագանքի բացակայությունը էական քաղաքական նշանակություն չի կարող ունենալ: Պաշտոնական Երևանը թուրք-ադրբեջանական միացյալ ուժի սպառնալիքի քաղաքականության պատանդն է, իսկ պաշտոնական Ստեփանակերտն էլ եղբայրական Ռուսաստանի բարեխնամ ամուր գրկում է հայտնվել ու ինքնուրույն շարժվելու հնարավորությունը չունի: