Յոթանասունմեկ տարեկանում մահացել է Հայաստանի Հանրապետության և Վրաստանի պետական պարգևների արժանացած վիրահայ բանաստեղծ, Վրաստանի հայ գրողների «Վերնատուն» միության հիմնադիր նախագահ, Նինոծմինդայի «Ռաֆայել Ջավախ» կրթամշակութային կենտրոնի տնօրեն Ժորա Սնխչյանը:
Այս մասին հայտնում է Վրաստանում Հայաստանի դեսպանությունը:
Ժորա Սնխչյանը ծնվել է 1951 թվականի հունվարի 5-ին Վրաստանի Բոգդանովկայի (այժմ՝ Նինոծմինդայի) շրջանի Ջիգրաշեն գյուղում: Սովորել է տեղի, ապա՝ Բոգդանովկայի հայկական դպրոցներում: 1968-ին ընդունվել և 1973-ին ավարտել է ԵՊՀ-ի բանասիրական ֆակուլտետը: Ավարտելուց հետո աշխատել է ծննդավայրի միջնակարգ դպրոցում, 1976-ից՝ շրջանային կոմերիտական և կուսակցական մարմիններում, շրջանային թերթի խմբագրությունում: 1992-ին ընտրվել է Վրաստանի I պրոֆեսիոնալ խորհրդարանի անդամ, այնուհետև աշխատել է երկրի նախագահի աշխատակազմում որպես խորհրդական, ազգամիջյան հարաբերությունների ծառայության պետի տեղակալ: 2006 թվականից ցայսօր աշխատում էր Նինոծմինդայի մունիցիպալիտետի մշակույթի, կրթության, սպորտի, հուշարձանների պահպանության և երիտասարդական հարցերով ծառայության պետ: Պարգևատրվել է ՎՀ Պատվո շքանշանով, ՀՀ Մովսես Խորենացի մեդալով, ՀՀ մշակույթի նախարարության երկու ոսկե մեդալներով, ՀՀ սփյուռքի նախարարության Վիլյամ Սարոյան մեդալով, ՀԳՄ «Գրական վաստակի համար» մեդալով և այլն: 1997-ից Վրաստանի հայ գրողների «Վերնատուն» միության հիմնադիր նախագահն է, խմբագրում է «Վերնատուն» և «Զարթոնք» գրական տարեգրքերը: Հայաստանի և Վրաստանի գրողների միությունների անդամ է, մի քանի գրքերի հեղինակ:
