Սպիտակ տան խոսնակ Ջեյն Պսակին հայտարարել է, որ ԱՄՆ նախագահ Ջո Բայդենն այլևս չի համարում, թե ՌԴ ներխուժումն Ուկրաինա անխուսափելի է: Բայդենն այդ բառն օգտագործել էր օրեր առաջ՝ Ուկրաինայի նախագահ Զելենսկու հետ հեռախոսազրույցի ընթացքում: Ընդ որում, ըստ տարածված հաղորդագրությունների, Ուկրաինայի նախագահը դժգոհել էր այդպիսի բնորոշման կապակցությամբ և ասել, որ իրենց ունեցած տվյալներով ներխուժման վտանգը անխուսափելի կամ այդքան մեծ չէ, որքան տարածում է Արևմուտքը: Զելենսկին ընդհանրապես այդ առնչությամբ դժգոհում էր, որ այդպիսի տեղեկությունները տարածում են խուճապ: Այժմ ահա, Սպիտակ տան խոսնակը հայտարարում է, որ հարձակումը անխուսափելի չէ: Ի՞նչ է փոխվել այս օրերի ընթացքում, որ փոխվում է Վաշինգտոնի հռետորաբանությունը: Իհարկե մեծ փոփոխության մասին խոսք չկա, որովհետև նույն խոսնակը նշել է, որ հարձակում այդուհանդերձ կարող է լինել ցանկացած պահի և ՌԴ նախագահը կարող է ցանկացած պահի ընդունել այդպիսի որոշում: Այդուհանդերձ, սպառնալիքի գնահատման մեկ կամ կես սանդղակ իջեցումը արժանի է ուշադրության, որովհետև խոսքն ԱՄՆ նախագահի գնահատականի մասին է: Արդյո՞ք ՌԴ նախագահ Պուտինը տվել է որևէ խոստում կամ ազդակ, որ պատրաստ է նահանջի: Բայց, այդ դեպքում ինչի՞ դիմաց: Ի՞նչ է ստացել նա: Թե՞ խնդիրը ոչ թե ինչ որ բան ստանալու դիմաց նահանջն է, այլ որևէ բան չկորցնելու համար նահանջը: Իրավիճակը շարունակում է մնալ անորոշ: Միակ որոշակին թերևս այն է, գոնե առայժմ, որ Ուկրաինայի շուրջ Ռուսաստանի բավականին ծավալուն զորաշարժը հանգեցրեց նրան, որ ԱՄՆ-Մեծ Բրիտանիա տանդեմը ոչ պակաս ակտիվ դիվանագիտա-քաղաքական և ընդհուպ ռազմական շարժով փաստացի իր ենթակայության տակ վերցրեց ամբողջ Արևելյան Եվրոպան կամ Հյուսիսային և Արևելյան Եվրոպան, որովհետև բավականին նշանակալի հայտարարություններ եղան նաև Սկանդինավյան ուղղության վերաբերյալ:
Ավելին, առաջիկայում սպասվում է Բրիտանիա, Լեհաստան, Ուկրաինա ռազմա-քաղաքական ալյանս: Զուգահեռ, ԱՄՆ նախագահ Բայդենը հայտարարել է Կատարին հատուկ դաշնակցի կարգավիճակ տալու մասին: Մինչդեռ, Կատարի հետ այդ երկխոսության ծավալման առիթը նույնպես եվրոպական ուղղությունն էր՝ Եվրոպա ռուսական գազին այլընտրանք գազամատակկարարման հարց լուծելը, այն դեպքի համար, եթե ռուսական ագրեսիվ քաղաքականությունը հանգեցներ ՌԴ գազի մատակարարումների դադարեցման: Այդպիսով ակնառու է, որ Ուկրաինայի շուրջ ծավալվեց բավականին բարդ խաղ և այդ խաղի այս փուլում թերևս եթե ոչ հաղթողը, ապա առավելության, դրության տերը կարծես թե ամերիկա-բրիտանական տանդեմն է, որը գործնականում նոր իրավիճակ հաստատեց Եվրոպայում և որոշակիորեն ստվերեց Եվրամիության առաջատարներ Գերմանիայի ու Ֆրանսիայի քաղաքական դերակատարումը: Իհարկե Փարիզն ու Բեռլինը պայքարում են դրա դեմ:
Ֆրանսիայի նախագահ Մակրոնը վերջին օրերին երկու հեռախոսազրույց ունեցավ ՌԴ նախագահ Պուտինի հետ, իսկ Գերմանիայի կանցլերը նախ հեռախոսազրույց ունեցավ ԱՄՆ նախագահ Բայդենի հետ, իսկ այժմ պատրաստվում է մեկնել Ռուսաստան Պուտինի հետ հանդիպման: Բայդենի հետ նախօրեին հեռախոսազրույց է ունեցել նաև Ֆրանսիայի նախագահ Մակրոնը: Սակայն ակնառու է, որ Ուկրաինայի հանդեպ ռուսական ագրեսիայի թեմայի գեներացումը հանգեցրեց իրավիճակի, երբ Ֆրանսիան ու Գերմանիան Եվրոպայում հայտնվեցին ամերիկա-բրիտանական որոշակի օղակում:
Այդ ամենն իհարկե դեռ ամենևին վերջը չէ, սակայն սպառնալիքի աստիճանի մեկ կամ կես քայլ իջեցումով Բայդենը հուշում է, որ մի փուլ ԱՄՆ-ը համարում է անցած: Ի՞նչ փուլ կարող է մեկնարկել այժմ, բարդ է ասել, սակայն առաջին փուլի արդյունքից թերևս դժգոհ է նաև Չինաստանը, ինչը արտահայտվում է ձմեռային օլիմպիադայի բացման առիթով Պեկին մեկնող ՌԴ նախագահ Պուտինի պատվիրակությունը կրճատելու հորդորով:
ՌԴ նախագահի օգնականը հայտնել է, որ մտադիր էին մեկնել 20-25 հոգանոց պատվիրակությամբ, սակայն Պեկինը հայտնել է, որ պատվիրակությունը պետք է լինի ոչ ավելի, քան 6 մարդ՝ համաճարակի պատճառով: Անկասկած է, որ 20-25 հոգին օլիմպիադայի բացման չէ, որ գնալու էին, ու անկասկած է նաև, որ Պեկինի համար որևէ «մահացու սպառնալիք» չէր ռուսական 20-25 հոգանոց պատվիրակությունը: Անկասկած է, որ արտահայտվել է վերաբերմունք, դժգոհություն, ինչը մեծ հավանականությամբ պայմաբավորված է ուկրաինական «մրցամարտի» այս փուլում ամերիկա-բրիտանական տանդեմին որոշակի հարցեր լուծելու, Ռուսաստանի կամա, թե ակամա «շոշափելի օժանդակություն» ցուցաբերած լինելու հանգամանքով: Ավելին, չի բացառվում, որ Պեկինն այդ առնչությամբ կարող է ունենալ նաև ՌԴ վարքի առումով կասկածներ: Հատկանշական է, որ Սպիտակ տունը գրոհի «անխուսափելի չլինելու» մասին հայտարարում է Պուտինի Պեկին այցին ընդառաջ: Ինչպես կմեկնարկի և կընթանա «ուկրաինական պարտիայի» նոր փուլը, որը թերևս «կմեկնարկի» Չինաստանից: