« Դեռևս 2020-ի ապրիլին Հայաստանում առաջին անգամ հաստատվեց երեխայի՝ ընտանիքում ապրելու իրավունքի իրացմանն ու ներդաշնակ զարգացմանն ուղղված 2020-2023 թվականների համալիր ծրագիրը, որը հիմնված է ընտանիքների ամրապնդման քաղաքականության, ընտանիքում երեխաների խնամքի կազմակերպման, երեխաների՝ կյանքի դժվարին իրավիճակի կանխարգելման սկզբունքների վրա։
Նույն թվականի նոյեմբերին հրապարակած իմ հաշվետվության մեջ նշել էի, որ ավելի քան չորս անգամ մեծացել է երեխաների մուտքը հաստատություններ կանխարգելող ծրագրերի ծավալը՝ 120 երեխայի փոխարեն ծառայություններում ընդգրկելով 565 երեխայի։
Սա, իհարկե, չի նշանակում, որ միայն այդ ծրագրերի արդյունքում է, որ երեխաները չեն հայտնվել հաստատությունում, բայց հենց այդպիսի հետևողական քաղաքականության միջոցով մենք պետք է հրաժարվենք մանկատներից և երեխաների շուրջօրյա խնամքի հաստատություններից:
Այսօր շուրջ 180 երեխա ապրում է ոչ պետական հաստատություններում: Տարբեր բարեգործական կազմակերպությունների, անհատների, եկեղեցական կառույցների ֆինանսավորմամբ և աջակցությամբ, այս երեխաները խնամք են ստանում շուրջօրյա հաստատություններում: Այս կազմակերպությունները և անհատները մեր գործընկերները պետք է դառնան երեխաներին ընտանիքների հետ վերամիավորելու, ընտանիքներին աջակցելու համար:
Իհարկե, այս գործընթացը պետք է մշակել և իրականացնել բոլոր շահագրգիռ կողմերի մասնակցությամբ, զարգացնելով երեխաներին տրամադրվող ցերեկային ծառայությունները, ընտանիքների աջակցության ծրագրերը և այլն: Բայց մի բան հստակ է, մենք պետք է գործնական քայլեր իրականցնենք բոլոր տեսակի մանկատներից հրաժարվելու և երեխայի ընտանիքում ապրելու և զարգանալու իրավունքն ապահովելու համար»։
ՀՀ ԱԺ «Քաղաքացիական պայմանագիր» խմբակցության պատգամավոր Զարուհի Բաթոյան
