Նախօրեին հայտնի է դարձել, որ Հայաստանի ու Թուրքիայի հատուկ բանագնացների երկրորդ հանդիպումը տեղի կունենա փետրվարի 24-ին՝ Վիեննայում: Այդ մասին հայտնել է Հայաստանի արտգործնախարարությունը: Հատկանշական է, որ հանդիպման մասին տեղեկությունն այս անգամ առաջինը հրապարակում է հայկական կողմը: Կա մեկ այլ հատկանշական հանգամանք: Դա տեղի է ունենում Ավստրիայի արտգործնախարարի Հայաստան կատարած այցից անմիջապես հետո:
Փետրվարի 2-3-ը Հայաստան էր այցելել Ավստրիայի արտգործնախարար Ալեքսանդր Շալենբերգը: Նրա այցի ընթացքում Հայաստանում տեղի է ունեցել հայ-ավրստիական բիզնես ֆորում, ինչպես նաև բացվել է Հայաստանում Ավստրիայի զարգացման գործակալության գրասենյակ: Եվ ահա, ավստրիացի արտգործնախարարի այցից հետո Երևանը հայտարարում է հայ-թուրքական կարգավորման գործընթացում երկու երկրների հատուկ բանագնացների հաջորդ հանդիպման օրն ու վայրը: Արդյո՞ք հենց այդ հարցն էր Ավստրիայի արտգործնախարարի հայաստանյան այցելության բուն պատճառը, իհարկե սակայն ավելի լայն համատեքստով: Այսինքն, արդյո՞ք Ավստրիան կարող է հայ-թուրքական գործընթացում ստանձնել ավելի երկարաժամկետ դեր, ինչով էլ պայմանավորված էր այդ երկրի արտգործնախարարի այցը Հայաստան և Հայաստանում Ավստրիայի երկարաժամկետ ծրագրային մտադրությունների դրսևորումը: Ինչպես հայտնի է, հայ-թուրքական ֆուտբոլային դիվանագիտությունն իրականացվում էր շվեյցարական միջնորդությամբ: Հնարավո՞ր է, որ այս անգամ այդ դերը իրականացնում է կամ կարող է իրականացնել Շվեյցարիայի հարևան՝ Ավստրիան:
Համենայնդեպս այն, որ երկրորդ հանդիպման վայր է ընտրվում Վիեննան և դրա մասին հայտարարվում է Ավստրիայի ԱԳ նախարարի այցից հետո, ժամանակագրական ուշագրավ զուգահեռ է: Հայ-թուրքական առաջին հանդիպումն ինչպես գիտենք տեղի ունեցավ Մոսկվայում: Ընդ որում, թուրքական կողմը հայտարարել էր, որ դա եղել է Հայաստանի ցանկությունը: Առաջին հանդիպումից հետո Անկարան հայտարարել էր, որ նախընտրելի է հայ-թուրքական հանդիպումներն անցկացնել Հայաստանում և Թուրքիայում, այլ ոչ երրորդ երկրներում: Բայց, երկրորդ հանդիպումը փաստորեն տեղի է ունենալու երրորդ երկրում՝ Ավստրիայում, և սա մեկ այլ հետաքրքիր հանգամանք է: Հայկական կո՞ղմն է դեմ եղել միայն Հայաստանում ու Թուրքիայում հանդիպելուն, թե՞ երրորդ երկրում հանդիպման հանգամանքը պայմանավորված է հայ-թուրքական գործընթացի շահառուների գործնականում լայն շրջանակով: Այդ իմաստով հատկանշական է, թե ինչպիսին կլինի Վիեննայի հանդիպման առնչությամբ Ռուսաստանի վերաբերմունքը: Այստեղ իհարկե կա երկու հանգամանք: Վիեննան զուտ հանդիպման վա՞յր է, թե՞ դիտարկվում է Ավստրիայի հնարավոր ավելի երկարաժամկետ դերակատարում, ինչի մասին խոսեցի ավելի վեր:
Բանն այն է, որ ռուս-ավստրիական հարաբերությունը անամպ չէ: 2020 թվականին կողմերը արտաքսեցին դիվանագետների՝ նախ Ավստրիան, այսպես ասած լրտեսության մեղադրանքով արտաքսեց ռուս դիվանագետի, հետո ի պատասխան դրա նույնն արեց Ռուսաստանը: Հետագայում իհարկե լարվածությունը ծավալում չունեցավ: Ներկայումս, ուկրաինական ճգնաժամի համատեքստում, Ավստրիայի արտգործնախարարը մի կողմից դեմ է արտահայտվել ՌԴ ներխուժման դեպքում գազային սեկտորի հանդեպ պատժամիջոցը՝ քանի որ Եվրոպան ունի գազային կախվածություն ՌԴ-ից, մյուս կողմից նշել է, որ Պուտինը կբախվի տնտեսական մասշտաբային պատժամիջոցների, եթե գնա ռազմական գործողության: Միով բանիվ, հայ-թուրքական կարգավորման գործընթացի երկրորդ հանդիպումը սպասվում է քսան օր անց և պետք է հուսալ, որ Ուկրաինայի շուրջ գերլարված իրավիճակի զարգացումները չեն լինի այնպիսին, որ բացասական ազդեցություն կունենան այդ հանդիպման վրա: